ప్రపంచవ్యాప్తంగా మొత్తం కరోనా కేసుల సంఖ్య 5 కోట్ల 48 లక్షలు దాటింది. ఇప్పటివరకు 13 లక్షల 24 వేల మందికి పైగా కొవిడ్ ధాటికి బలయ్యారు. అమెరికా, ఐరోపా దేశాల్లోనే కరోనా కేసులు భారీగా నమోదవుతున్నాయి. బ్రిటన్ ప్రధాని రెండోసారి క్వారంటైన్లోకి వెళ్లారు.
అమెరికాలో 11మిలియన్లు దాటిన కరోనా కేసులు
By
Published : Nov 16, 2020, 8:45 AM IST
|
Updated : Nov 16, 2020, 10:09 AM IST
ప్రపంచ దేశాల్లో కరోనా విలయం కొనసాగుతోంది. ముఖ్యంగా అమెరికా, ఐరోపా దేశాల్లో వైరస్ బాధితులు విపరీతంగా పెరుగుతున్నారు. ఫలితంగా ప్రపంచవ్యాప్తంగా మొత్తం కేసుల సంఖ్య 5 కోట్ల 48 లక్షలు దాటింది. మరణాలు 13 లక్షల 24 వేలు దాటాయి.
అమెరికాలో తాజాగా లక్షా 37 వేల మంది కరోనా బారిన పడ్డారు. దీంతో మొత్తం కేసుల సంఖ్య కోటీ 10 లక్షలు దాటింది. మరో 579 మంది మరణించగా మొత్తం మృతుల సంఖ్య 2 లక్షల 51 వేలు దాటింది.
రాష్ట్రాల్లో లాక్డౌన్-2.0!
అమెరికాలో కొవిడ్ కేసులు పెరుగుతున్న నేపథ్యంలో పలు రాష్ట్రాలు మళ్లీ కఠిన నిబంధనలు అమలు చేస్తున్నాయి. తొలుత కాలిఫోర్నియాలో మాస్కులు ధరించడాన్ని తప్పనిసరి చేయగా.. ఆంక్షలు విధిస్తూ ఉత్తర్వు జారీ చేశారు ఆ రాష్ట్ర గవర్నర్. అనంతరం టెక్సాస్, వాషింగ్టన్, మిషిగన్ రాష్ట్రాలు కూడా.. వైరస్ వ్యాప్తి నివారణకు కాలిఫోర్నియా మార్గాన్నే అనుసరిస్తున్నాయి.
ఐరోపా దేశాల్లోనూ కొవిడ్ కేసులు భారీగా నమోదవుతున్నాయి. బ్రిటన్లో కొత్తగా 26,860 కేసులు నమోదవగా.. మొత్తం కేసుల సంఖ్య 13 లక్షల 69 వేలు దాటింది. మరో 462 మంది మరణించారు.
స్వీయ నిర్బంధంలోకి బ్రిటన్ పీఎం..
బ్రిటన్ ప్రధాని బోరిస్ జాన్సన్ స్వీయ నిర్బంధంలోకి వెళ్లారు. ఆయన ఇటీవల కలిసిన ఓ పార్లమెంట్ సభ్యుడికి కరోనా పాజిటవ్గా తేలింది. ఈ నేపథ్యంలో వైద్యుల సలహాతో హోం క్వారంటైన్లోకి వెళ్లారు జాన్సన్.
ప్రస్తుతానికి బోరిస్‌కు ఎలాంటి లక్షణాలు లేవని ఆయన అధికార ప్రతినిధి తెలిపారు. బోరిస్ జాన్సన్ ఏప్రిల్‌లో ఓసారి కరోనా బారినపడ్డారు. దాదాపు 3 రోజులు ఐసీయూలో ఉండాల్సి వచ్చింది. చికిత్స అనంతరం కోలుకొని తిరిగి విధులకు హాజరవుతున్నారు.
ఫ్రాన్స్లో తాజాగా 27,228 కేసులు వెలుగుచూడగా.. మరో 302 మంది చనిపోయారు.
ఇటలీలో ఒక్కరోజే 33,979 మందికి వైరస్ సోకింది. కొవిడ్ ధాటికి మరో 546 మంది ప్రాణాలు కోల్పోయారు.
రష్యాలో కొత్తగా 22,572 మందికి పాజిటివ్గా తేలింది. మరో 352 మంది మృతి చెందారు.
బ్రెజిల్లో తాజాగా 14,134 కేసులు నమోదయ్యాయి. మరో 138 మంది మరణించారు.
