ఆన్​లైన్​లో ఫుడ్​ ఆర్డర్​.. స్పేస్​లో డెలివరీ

Uber Eats Delivery in Space: వివిధ దేశాల్లో ఫుడ్ డెలివరీ సేవలు అందిస్తున్న ఉబర్​ ఈట్స్​.. తాజాగా స్పేస్​కు కూడా ఆహారం చేరవేసింది. జపాన్​కు చెందిన యుసాకు మేజావా అనే వ్యాపారవేత్త ద్వారా అంతరిక్ష కేంద్రంలోని వ్యోమగాములకు వీటిని అందించింది.

Uber Eats Delivery in Space: 'ఫుడ్​ డెలివరీ సర్వీసులు ప్రపంచవ్యాప్తంగా విస్తరిస్తున్నాయి'.. ఇక నుంచి ప్రపంచవ్యాప్తంగాకు బదులు విశ్వవ్యాప్తంగా అనాలేమో. ఎందుకంటే అంతరిక్షంలో కూడా ఈ ఫుడ్​ డెలివరీ సర్వీసులు అందుబాటులోకి వచ్చేశాయి. వివిధ దేశాల్లో ఫుడ్​ డెలివరీ సేవలు అందిస్తున్న ఉబర్​ ఈట్స్.. ​అంతర్జాతీయ అంతరిక్ష కేంద్రంలోని వ్యోమగాములకు రకరకాల ఆహార పదార్థాలను పంపించింది. దీంతో అంతరిక్షంలోకి ఫుడ్​ డెలివరీ చేసిన తొలిసంస్థగా ఉబర్​ ఈట్స్​ రికార్డ్​ సృష్టించింది. వీటిని ఓ దిగ్గజ వ్యాపారవేత్త తీసుకెళ్లడం విశేషం.

జపాన్​కు చెందిన ప్రముఖ వ్యాపారవేత్త యుసాకు మేజావా అంతరిక్ష పర్యటనకు బుధవారం సిద్ధమయ్యారు. ఈ క్రమంలో ఉబర్​ ఈట్స్..​ వ్యోమగాములకు అందించాల్సిన ఆహార పదార్థాలను మేజావాకు ఇచ్చి పంపించింది. తొమ్మిది గంటల పాటు ప్రయాణం తర్వాత ఐఎస్​ఎస్​కు చేరుకున్న మేజాకు.. అక్కడి వ్యోమగాములకు ఉబర్​ ఈట్స్​ పార్సెల్​ను అందించారు. ఇందుకు సంబంధించిన వీడియో ట్విట్టర్​లో షేర్​ చేసింది ఉబర్​ ఈట్స్.

ఇంతకీ ఏమున్నాయంటే..

వ్యోమగాముల కోసం తినడానికి రెడీగా ఉన్న పలు వంటకాలను పంపించింది ఉబర్​ ఈట్స్​. స్వీట్​ సాస్​తో వండిన బీఫ్​, మిసో పేస్ట్​లో ఉడికించిన మెక్​కెరెల్​ చేపలు, ​బ్యాంబూ షూట్స్​తో వండిన చికెన్​, బ్రేయిస్డ్​ పోర్క్​లు ఈ మెనూలో భాగం.

12 రోజుల పాటు అక్కడే..

ఉబర్​ ఈట్స్​ ఫుడ్​ను వ్యోమగాములకు అందించిన బిలియనీర్​ యుసాకు మేజావా కూడా 12 రోజుల పాటు అంతరిక్ష కేంద్రంలోనే గడపనున్నారు. బుధవారం కజఖస్థాన్​లో బయలుదేరిన మేజావా.. 9 గంటల పాటు ప్రయాణించి ఐఎస్​ఎస్​ చేరుకున్నారు. ఇవి మర్చిపోలేని క్షణాలని పేర్కొన్నారు మేజావా.

ప్రస్తుతం బిలియనీర్లకే అందుబాటులో ఉన్న ఈ స్పెస్​ ట్రావెల్​ మరో 10 లేదా 20 ఏళ్లలో అందరికీ అందుబాటులోకి వచ్చే అవకాశం ఉందని అభిప్రాయపడ్డారు.

ఇదీ చూడండి :వాట్సాప్​ నుంచే జియో రీఛార్జ్.. నిత్యావసరాల కొనుగోలు కూడా!