ప్రపంచ దేశాలు తీవ్రస్థాయిలో ఒడుదొడుకులు ఎదుర్కొంటున్న వేళ.. కాలం చైనాకు అనుకూలంగా ఉందని ఆ దేశాధ్యక్షుడు షీ జిన్పింగ్ తెలిపారు. సమయానికి అనుగుణంగా చైనా ఊపందుకుంటుందన్నారు.
సీపీసీ(కమ్యూనిస్ట్ పార్టీ ఆఫ్ చైనా) కార్యకర్తలనుద్దేశించి ప్రసంగించారు జిన్పింగ్. ఈ సందర్భంగా రానున్న 30ఏళ్లల్లో చైనాను గొప్ప స్థాయిలో నిలిపే విధంగా పార్టీ రూపుదిద్దుకుంటుందన్నారు.
"శతాబ్ద కాలంలో ఎన్నడూ లేని విధంగా ప్రపంచం అల్లకల్లోలంగా ఉంది. కానీ కాలం మాత్రం చైనా వైపు ఉంది. మన విశ్వాసం, దృఢ సంకల్పాన్ని చూపించాల్సిన సమయం ఇది."
--- జిన్పింగ్, చైనా అధ్యక్షుడు.
కరోనా సంక్షోభం, ప్రపంచ దేశాలతో బలహీనపడుతున్న బంధాలు, మందగిస్తున్న ఆర్థిక వ్యవస్థ వంటి సమస్యలతో చైనా అతలాకుతలమవుతున్నప్పటికీ.. సోమవారం జరిగిన కార్యక్రమంలో జిన్పింగ్ ఈ వ్యాఖ్యలు చేయడం గమనార్హం.