సెక్యూరిటీ గార్డ్​కు డ్యూటీ ఫస్ట్ రోజే బోర్​.. రూ.కోట్ల పెయింటింగ్ ఫసక్!

Three Figures Painting: బోర్ కొట్టిందని ఓ సెక్యూరిటీ గార్డ్‌ చేసిన ఘనకార్యం.. మొదటి రోజే తన ఉద్యోగాన్ని ఊడగొట్టింది. గ్యాలరీలో ఉంచిన కోట్ల రూపాయల విలువైన పెయింటింగ్‌ను రక్షించాల్సిన వ్యక్తి.. దానిపై పెన్నుతో గీతలు గీసి నిర్వాహకులు ఆగ్రహానికి గురయ్యాడు. వివరాల్లోకి వెళితే..

Three Figures Painting: రష్యాలోని బోరిస్ ఎల్ట్సిన్ ప్రెసిడెన్షియల్ సెంటర్‌లో ఓ వ్యక్తి సెక్యూరిటీ గార్డ్‌గా విధుల్లో చేరాడు. అక్కడి ఆస్తుల్ని రక్షించాల్సిన ఆ వ్యక్తికి మొదటిరోజే విసుగ్గా అనిపించింది. దాంతో అక్కడ ప్రదర్శనలో ఉన్న 'త్రీ ఫిగర్స్‌' పెయింటింగ్‌పై తన విసుగును ప్రదర్శించాడు. ఆ పెయింటింగ్‌లో ఉన్న మూడు చిత్రాలకు ముఖాకృతి ఖాళీగా ఉన్నట్లు కనిపిస్తుంది. ఈ గార్డ్ అందులోని రెండు ముఖాలపై తన బాల్‌పాయింట్‌ పెన్నుతో కళ్లు గీశాడు. 2021 డిసెంబరు 7న ఈ ఘటన జరిగినట్లు తెలుస్తోంది. అయితే ప్రదర్శనను వీక్షించేందుకు వచ్చిన కొందరు ఈ మార్పును గుర్తించి, నిర్వాహకులకు తెలియజేశారు. ఆ పని చేసింది ఎవరో తెలుసుకున్న యాజమాన్యం.. అతడిని విధుల్ని తొలగించింది.

అన్నా లెపోర్స్కాయ 'త్రీ ఫిగర్స్‌' పేరిట ఈ కళాఖండాన్ని సృష్టించారు. ఈ కళాఖండం వాస్తవ ధరపై స్పష్టత లేదు కానీ.. దీని పేరిట రూ.7.51 కోట్ల విలువైన బీమా ఉంది. కాగా, ఆ పెయింటింగ్‌పై పెన్నుతో బలంగా గీయకపోవడంతో.. పెద్దగా నష్టం వాటిల్లలేదని తెలుస్తోంది. అయితే దానికి పూర్వ రూపం తెచ్చేందుకు రూ.2.5 లక్షలు ఖర్చవుతుందని నిపుణులు అంచనా వేస్తున్నారు.

ఇదీ చూడండి:అమ్మాయి పుడుతుందని డౌట్.. అబ్బాయిలా మార్చేస్తానని గర్భవతి తలకు మేకు!