ఘుమఘుమలాడే కూరలు వండాలంటే.. అందులో మసాలా వేయాల్సిందే. వాటిని కలిపితే కానీ వంటకు రుచి రాదు. భారతీయులైతే మసాలా లేకుండా వంటను ఊహించలేరు. భారత్‌లోనే కాదు, వివిధ దేశాల ప్రజలు కూడా వారి అభిరుచికి తగ్గట్టు మసాలా మిశ్రమాలను వాడుతుంటారు. అయితే, పర్షియన్‌ గల్ఫ్‌లో ఇరాన్‌ పరిధిలో ఉన్న హర్ముజ్ ఐలాండ్‌లోని ప్రజలు మాత్రం మట్టినే మసాలాగా ఉపయోగిస్తున్నారు. ఇక్కడి మట్టిని వంటలో వేస్తే అద్భుతమైన రుచి వస్తుందట.
ప్రపంచంలో మరెక్కడా లేనివిధంగా ఈ ఐలాండ్‌లోని పర్వతాలు వివిధ వర్ణాల్లో కనిపిస్తూ కనువిందు చేస్తాయి. అందుకే ఈ ప్రాంతాన్ని రెయిన్‌బో ఐలాండ్ అని కూడా పిలుస్తుంటారు. ఇక్కడి ఒక్కో రంగు పర్వతం ఒక్కో రుచిగల మట్టిని కలిగి ఉంటుంది. దీంతో స్థానిక ప్రజలు ఈ పర్వతాల మట్టిని మసాలా దినుసులు కలిపినట్టు కలిపేసి.. వంటల్లో వేస్తుంటారు. ఇక్కడి మట్టిలో ఐరన్‌తోపాటు 70 రకాల ఖనిజాలున్నాయట. దీంతో ఈ మట్టి మసాలాలు రుచికరంగా ఉండటమే కాదు.. ఆరోగ్యాన్ని పెంపొందిస్తాయని స్థానికులు చెబుతున్నారు.