కరోనా వైరస్(కొవిడ్‌ 19).. ఇప్పుడిది చైనాలోని వుహాన్‌కే పరిమితమైన అంటువ్యాధి కాదు. దాని సరిహద్దుల్ని ఎప్పుడో దాటేసి.. విశృంఖలంగా విజృంభిస్తూ.. అనేకానేక దేశాలను చుట్టబెట్టేస్తోంది. చైనాలో నమోదవుతున్న కేసుల సంఖ్య నెమ్మదిగా తగ్గుముఖం పడుతుంటే.. బయటిదేశాల్లో మాత్రం ఇది శరవేగంగా వ్యాపిస్తోంది. ఈ వైరస్‌కు 'ప్రపంచ అంటువ్యాధి'గా మారే సత్తా ఉందన్న ప్రపంచ ఆరోగ్యసంస్థ(డబ్ల్యూహెచ్‌ఓ) హెచ్చరికల్ని ముమ్మాటికీ నిజం చేస్తోంది. వివిధ దేశాల్లో శీఘ్రగతిన వ్యాపిస్తూ.. పదుల సంఖ్యలో ప్రజలను పొట్టనబెట్టుకుంటోంది. ఒక్క అంటార్కిటికా తప్ప మొత్తం ఆరు ఖండాల్నీ ఈ వైరస్ చుట్టేసింది. దీంతో అనేకదేశాలు అతలాకుతలం అవుతున్నాయి. స్టాక్‌మార్కెట్లు కుప్పకూలుతున్నాయి. ఆర్థిక వ్యవస్థల్లో అల్లకల్లోలం రేగుతోంది. ఆరోగ్య సంక్షోభాలు తలెత్తుతున్నాయి. జనం బహిరంగ ప్రదేశాల్లో గుమికూడకుండా, వైరస్ సోకిన దేశాలకు ప్రయాణించకుండా వివిధ దేశాలు నిషేధం విధిస్తున్నాయి. విమాన సర్వీసుల్ని రద్దుచేస్తున్నాయి. వైరస్ సోకినవారిని బలవంతంగా ఆసుపత్రుల్లో ఉంచి చికిత్స అందిస్తున్నారు.
చైనా తర్వాత అత్యధిక కేసులు దక్షిణ కొరియా(2337)లో నమోదయ్యాయి. దేశంలో మరణాలు అంతకంతకూ పెరుగుతుండడంతో దక్షిణకొరియా ప్రజలు ఇళ్ల నుంచి బయటికి రావడానికే వణుకుతున్నారు. దీని దెబ్బకు హ్యుందాయ్‌ మోటార్స్‌ తన ప్లాంట్లలో ఒకదాన్ని తాత్కాలికంగా మూసేస్తోంది. దేగూ నగరం, చెంగ్డో కౌంటీల్లో ఎక్కువ కేసులు నమోదవుతున్నాయి.
ఇరాన్‌ గజగజ..
ఇరాన్‌లో నమోదైన కేసులు తక్కువే అయినా.. ఎక్కువ మరణాలు(34) సంభవిస్తుండడం ఈ దేశానికి కంటిమీద కునుకు లేకుండా చేస్తోంది. ఏకంగా ఇరాన్‌ ఉపాధ్యక్షుడు మసౌమే ఎబ్తేకర్‌కు, ఆరోగ్య ఉపమంత్రికి వైరస్ సోకింది. వాటికన్‌లో ఇరాన్‌ తొలి రాయబారి హదీ ఖోస్రోసాహి ఈ వైరస్ సోకి మరణించారు. వైరస్ వ్యాప్తి తీవ్రత దృష్ట్యా ఇరాన్‌ శుక్రవారం ప్రార్థనల్నీ రద్దుచేసింది. దాదాపు 10 ప్రావిన్సుల్లో పాఠశాలల్ని మూసేశారు.
ఏ దేశంలో ఏం జరుగుతోంది?
* జపాన్‌లోని రెండో అతిపెద్ద ద్వీపం హొకైడోలో అత్యవసర పరిస్థితిని విధించారు. టోక్యోలోని డిస్నీ రిసార్ట్‌, యూనివర్సల్‌ స్టూడియోలను రెండు వారాల పాటు మూసేశారు. మార్చి రెండోతేదీ నుంచి ఏప్రిల్‌ దాకా దేశంలోని దాదాపు 40 వేల పాఠశాలల్నీ మూసేస్తారు. జపాన్‌ తీరంలోని యొకొహామాలో నిలిపిఉంచిన ‘డైమండ్‌ ప్రిన్సెస్‌’ నౌకలోని 705 మందికి ఈ వైరస్ సోకింది. ఆరుగురు మృత్యువాత పడ్డారు.
* వైరస్ వ్యాప్తి నిరోధానికి అమెరికా భారీ బడ్జెట్‌ను కేటాయించింది. ప్రపంచవ్యాప్తంగా, ముఖ్యంగా ఇరాన్‌లో వైరస్ వ్యాప్తిని అమెరికా నిఘా సంస్థలు నిశితంగా గమనిస్తున్నాయి. ఉత్తర కాలిఫోర్నియా ప్రాంతానికి చెందిన ఓ మహిళ విదేశీ ప్రయాణం చేయకున్నా.., వ్యాధిగ్రస్తులనూ కలవకున్నా... వైరస్ బారిన పడడంతో ఆందోళన చెందుతున్నారు. ఆమెకు చికిత్స అందిస్తున్నారు.