అఫ్గాన్లో కాల్పుల విరమణకు తాలిబన్ అంగీకారం అఫ్గానిస్థాన్లో సుదీర్ఘ కాలంగా జరుగుతోన్న మారణహోమం నుంచి కాస్త ఊరట లభించింది. దేశవ్యాప్తంగా తాత్కాలిక కాల్పుల విరమణకు అంగీకరించినట్లు ప్రకటించింది తాలిబన్ సంస్థ. శాంతి చర్చల్లో భాగంగా ఈ నిర్ణయం తీసుకున్నట్లు పేర్కొంది. తాలిబన్ సంస్థ ప్రస్తుత నిర్ణయం అగ్రరాజ్యం అమెరికాతో శాంతి ఒప్పందం కుదుర్చుకునేందుకు ఓ అవకాశంగా కనిపిస్తోంది.
10 రోజుల పాటు..!
కాల్పుల విరమణకు తాత్కాలికంగా ఒప్పుకున్న తాలిబన్ సంస్థ .. అది ఎప్పటి నుంచి ఎప్పటి వరకు అనే అంశంపై స్పష్టతనివ్వలేదు. కానీ.. 10 రోజుల పాటు మాత్రమేమని తాలిబన్ శాంతి చర్చల ప్రతినిధి ఒకరు సూత్రప్రాయంగా తెలిపారు.
18 ఏళ్ల సుదీర్ఘ పోరాటం..
తాలిబన్లతో అమెరికా శాంతి చర్చలు కొనసాగుతూనే ఉన్నాయి. గత సెప్టెంబర్లో అర్ధాంతరంగా చర్చలు ముగించిన అధ్యక్షుడు ట్రంప్.. ఇటీవలే పునరుద్ధరిస్తున్నట్లు ప్రకటించారు. ఈ శాంతి ఒప్పందం కుదిరితే అఫ్గాన్ నుంచి అమెరికా బలగాల ఉపసంహరణ, 18 ఏళ్ల సుదీర్ఘ మిలటరీ ఒప్పందానికి ముగింపు పలకాల్సి ఉంటుంది. ప్రస్తుతం ఆఫ్గాన్లో 12వేల మంది అమెరికా సైనికులు ఉన్నారు.
అఫ్గానిస్థాన్ను ఉగ్రవాద సంస్థలకు నిలయంగా కాకుండా చేసేందుకు, అలాగే ఇతర అంశాల్లో తాలిబన్లతో ఒప్పందం కుదుర్చుకోవాలని చూస్తోంది అమెరికా. అయితే తాలిబన్ల అధినేత ఈ ఒప్పందానికి అంగీకరించాల్సి ఉంటుంది. కానీ అది జరిగే అవకాశం కనిపించటం లేదు.
ఇదీ చూడండి: సౌదీ మంత్రాంగం..'కశ్మీర్'పై ఓఐసీ భేటీకి ప్రణాళిక
