చమురు శుద్ధి కేంద్రంలో భారీ అగ్ని ప్రమాదం

ఇండోనేసియాలో భారీ అగ్ని ప్రమాదం జరిగింది. ఓ చమురు శుద్ధి కర్మాగారంలో చెలరేగిన మంటల్లో అనేక మంది గాయపడినట్టు సమాచారం. సహాయక చర్యలు చేపట్టిన అధికారులు.. వందకుపైగా అగ్నిమాపక వాహనాలతో మంటలను అదుపులోకి తెచ్చేందుకు ప్రయత్నిస్తున్నారు.

ఇండోనేసియాలో భారీ అగ్ని ప్రమాదం సంభవించింది. జావా ద్వీపం బలాంగాన్​లోని పెర్టామినా చమురు శుద్ధి కర్మాగారంలో పెద్దఎత్తున మంటలు చెలరేగాయి. ప్రమాద సమయంలో అక్కడున్న నలుగురు స్థానికులు గాయపడగా.. వారిని ఆస్పత్రికి తరిలించినట్టు అధికారులు పేర్కొన్నారు. అయితే.. ఎంతమంది గాయపడ్డారనే విషయమై స్పష్టత రాలేదు.

ఈ ఘటనలో కనీసం 20మంది గాయపడి ఉంటారని స్థానిక వార్తాపత్రిక వెల్లడించింది. వారిలో తీవ్రంగా గాయపడిన ఐదుగురిని ఆస్పత్రికి తరలించినట్టు తెలిపింది. పిడుగులు పడటమే ప్రమాదానికి కారణంగా భావిస్తున్నట్లు పేర్కొంది.

సోమవారం అర్ధరాత్రి 12:45 గంటల ప్రాంతంలో(భారత కాలమానం ప్రకారం ఆదివారం సాయంత్రం 5గంటలకు) ఈ ప్రమాదం జరిగినట్టు పెర్టామినా తెలిపింది. ఉవ్వెత్తున ఎగసిపడుతున్న మంటలను అదుపులోకి తెచ్చేందుకు వందకుపైగా అగ్నిమాపక శకటాలు అక్కడికి చేరుకున్నాయి. ముందస్తు చర్యల్లో భాగంగా అక్కడి స్థానికులను ఖాళీ చేయించారు అధికారులు. సుమారు వెయ్యి మందికిపైగా బలాంగాన్​ వాసుల్ని సురక్షిత ప్రాంతాలకు తరిలించినట్టు సమాచారం.

ఇదీ చదవండి:పాక్​లో మరో పురాతన ఆలయంపై దాడి!