3 గంటల 3 నిమిషాల్లోనే భువి నుంచి దివికి..!

ముగ్గురు రోదసి యాత్రికులు కేవలం 3 గంటల్లోనే నేల నుంచి నింగిలోని అంతర్జాతీయ అంతరిక్ష కేంద్రం చేరుకున్నారు. ఇంత వేగంతో అక్కడికి ప్రయాణం చేయడం ఇదే తొలిసారి. ఇంతకుముందు ఈ యాత్రకు కనీసం ఆరు గంటల సమయం పట్టేది. రష్యా స్పేస్​ ఏజెన్సీ, నాసాకు చెందిన వ్యోమగాములు ఈ ఘనత సాధించారు.

ముగ్గురు వ్యోమగాముల బృందం బుధవారం రికార్డు స్థాయిలో మూడు గంటల మూడు నిమిషాలు ప్రయాణించి అంతర్జాతీయ అంతరిక్ష కేంద్రానికి చేరుకున్నారు. వారిని ఇంత తక్కువ సమయంలో అంతరిక్ష కేంద్రానికి చేర్చిన ఘనత రష్యన్ అంతరిక్ష సంస్థకు దక్కింది. ఈ ఆర్బిటల్ ల్యాబ్‌ను చేరుకునేందుకు చేపట్టిన అత్యంత వేగవంతమైన మానవ సహిత ప్రయాణం ఇదేనని ఆ సంస్థ వెల్లడించింది. రష్యాకు చెందిన అంతరిక్ష కార్యక్రమాలను నిర్వహించే రోస్కాస్మోస్ ఈ విషయాన్ని ధ్రువీకరించగా, 'మూడు గంటల మూడు నిమిషాలు' అని ఆ సంస్థ చీఫ్ దిమిత్రీ రోగోజిన్ ట్వీట్‌ చేశారు.

రష్యా స్పేస్​ ఏజెన్సీకి చెందిన సెర్గే రిజికోవ్​, సెర్గే కుద్​-వెర్చ్​కోవ్​, నాసాకు చెందిన కేత్​ రూబిన్స్​లు బుధవారం ఉదయం కజక్​స్థాన్​లోని బైకొనుర్​ అంతరిక్ష కేంద్రం నుంచి సోయుజ్​ ఎంఎస్​-17 రాకెట్​ ద్వారా ఐఎస్​ఎస్​కు చేరుకున్నారు. ఆరు నెలల పాటు వారు అక్కడే ఉంటారు. మామూలుగా అయితే అక్కడికి చేరుకుకోవడానికి ఆరు గంటల సమయం పడుతుంది. కాగా, ఇప్పుడు ఆ సమయాన్ని రష్యా మూడు గంటలకు కుదించి రికార్డు సృష్టించింది.

''ఐఎస్​ఎస్​లోని రష్యా విభాగం నుంచి ఆక్సిజన్​ లీకవుతోంది. దాని కారణంగా ప్రస్తుతం ఎలాంటి ప్రమాదం లేదు. మేము ఎక్కడ నుంచి ఆక్సిజన్​ లీకవుతుందో గుర్తించి, మరమ్మతులు చేపడతాం. ఇందుకు అవసరమైన సరంజామాను మాతో పాటూ తీసుకెళ్తున్నాం.'' అని రిజికోవ్​ తెలిపారు.

యాత్రకు ముందు ఈ ముగ్గురూ పలుమార్లు కొవిడ్​ పరీక్షలు చేయించుకొని, క్వారంటైన్​లో కూడా ఉన్నారు. వీరు ఐఎస్​ఎస్​కు చేరుకోవడంతో.. గత ఏప్రిల్​ నుంచి అక్కడే ఉంటున్న మరో ముగ్గురు వ్యోమగాములు వారం రోజుల్లో తిరిగి భూమికి పయనమవుతారు.