శ్రీలంక పోలీసు విభాగం​ సారథిపై వేటు

శ్రీలంకలో వరుస పేలుళ్లకు నిఘా వైఫల్యమే కారణమని తేలిన నేపథ్యంలో దిద్దుబాటు చర్యలు చేపట్టారు ఆ దేశాధ్యక్షుడు. పోలీసు శాఖాధిపతి జయసుందరను విధుల నుంచి తొలగించారు. దేశ రక్షణ శాఖను పూర్తిగా సంస్కరిస్తామని చెప్పారు.

శ్రీలంక పోలీసు శాఖాధిపతి పుజిత్​ జయసుందరను విధుల నుంచి తొలగించారు దేశాధ్యక్షుడు మైత్రిపాల సిరిసేన. వరుస పేలుళ్లకు బాధ్యత వహిస్తూ ఇటీవలే రాజీనామా చేసిన రక్షణ శాఖ కార్యదర్శి స్థానంలో కొత్త వ్యక్తిని నియమించారు. దేశంలో ఈస్టర్​ రోజున జరిగిన ఉగ్రదాడుల తర్వాత రక్షణ వ్యవస్థను సంస్కరించే దిశగా చర్యలు తీసుకుంటున్నట్టు చెప్పారు సిరిసేన.

కొత్త పోలీస్​ బాస్​..

నిఘా వైఫల్యానికి బాధ్యత వహిస్తూ రాజీనామా చేయాలని పోలీసు శాఖ అధిపతి జయసుందర, రక్షణ శాఖ కార్యదర్శి హేమసిరి ఫెర్నాండోను ఆదేశించారు దేశాధ్యక్షుడు. ఫెర్నాండో గత గురువారం రాజీనామా చేయగా... జయసుందర మాత్రం ఆ ఆదేశాలను పాటించలేదు. రాజీనామా చేసినట్టు ప్రకటించినా... ఆయన ఎలాంటి పత్రాలు పంపలేదు. కార్యాలయాన్ని ఖాళీ చేయలేదు. అందుకే జయసుందరపై వేటు వేశారు సిరిసేన.

సీనియర్​ డిప్యూటీ ఇన్స్​పెక్టర్​ జనరల్​గా విధులు నిర్వర్తిసున్న సీడీ విక్రమరత్నె తాత్కాలిక పోలీసు అధిపతిగా నియమితులయ్యారు. ఎన్​కే ఇల్లంగకూన్​ను రక్షణశాఖ సలహాదారుడిగా నియమించారు సిరిసేన.

పార్లమెంటులో ఈ వారమే

పోలీసు అధిపతి జయసుందర తొలగింపు నిర్ణయానికి సంబంధించిన తీర్మానాన్ని ఈ వారమే పార్లమెంటు ముందుకు తీసుకొస్తామని శ్రీలంక మంత్రి నళిన్​ బండారా తెలిపారు. ప్రతిపక్ష ఎంపీలు తీర్మానానికి మద్దతు తెలుపుతారని ఆశాభావం వ్యక్తం చేశారు.

శ్రీలంకలో ఈస్టర్​ రోజున జరిగిన ఉగ్రవాదుల బాంబు పేలుళ్లలో 253 మంది చనిపోయారు. 500మందికిపైగా గాయపడ్డారు.