నేపాల్ కమ్యూనిస్ట్ పార్టీ(ఎన్సీపీ) ఛైర్మన్ పదవి నుంచి.. ప్రధాని కేపీ శర్మ ఓలిని తొలగిస్తూ నిర్ణయం తీసుకున్నారు పార్టీ ఎగ్జిక్యూటివ్ ఛైర్మన్ పుష్ప కమల్ దహల్ ప్రచండ. నూతన సభ్యులతో జరిగిన స్టాండింగ్ కమిటీ సమావేశం అనంతరం.. ఆయన ఈ విషయం వెల్లడించారు. ఓలిపై క్రమశిక్షణా చర్యలు తీసుకునేందుకు త్వరలో సమావేశం కానున్నట్లు స్పష్టం చేశారు.
ఓలి స్థానంలో ఛైర్మన్గా.. సీనియర్ నేత మాధవ్ కుమార్ నేపాల్ను పార్టీ ఏకగ్రీవంగా ఎన్నుకుంది.
అదే కారణం..
ఓలి.. పార్టీ సిద్ధాంతాలకు వ్యతిరేకంగా వ్యవహరిస్తున్నందున తొలగించాల్సి వచ్చిందని ఎన్సీపీ కేంద్ర కమిటీ సభ్యురాలు రేఖా శర్మ తెలిపారు. ఇప్పటినుంచి జరగబోయే సమావేశాలు ప్రచండ, మాధవ్ అధ్యక్షతన జరుగుతాయన్నారు.
కేంద్ర కమిటీ సభ్యుల్లో.. మూడింట రెండొంతుల మంది సమావేశానికి హాజరయ్యారు. ప్రచండను పార్లమెంటరీ పార్టీ నాయకుడిగా బుధవారం ఎన్నుకోనున్నట్లు తెలుస్తోంది.
చీలిక దిశగా నేపాల్ అధికార పార్టీ..
ప్రస్తుత పరిణామాల నేపథ్యంలో నేపాల్ కమ్యూనిస్టు పార్టీ(ఎన్సీపీ) చీలిక దిశగా పయనిస్తోంది. 3 రోజుల క్రితం ఏకపక్షంగా పార్లమెంటును రద్దుచేసి పార్టీలో అసమ్మతి వర్గానికి షాక్ ఇచ్చిన ఓలి.. అదే దూకుడు కొనసాగిస్తున్నారు. పార్టీలో మెజారిటీ మద్దతు లేనప్పటికీ తన పట్టు నిలుపుకునేందుకు అన్ని ప్రయత్నాలు ప్రారంభించారు. మంగళవారం తన సన్నిహితులైన కొద్దిమంది పార్టీ కేంద్ర కమిటీ సభ్యులతో సమావేశం నిర్వహించిన ఆయన.. ఎన్సీపీ సాధారణ సమావేశాల నిర్వహణకు 1199 సభ్యులతో కొత్త కమిటీని ప్రకటించారు. వారితో ప్రధాని అధికారిక నివాసంలో ప్రమాణస్వీకారం చేయించారు.
ఇదీ చదవండి :నేపాల్ పార్లమెంటు రద్దు- వేసవిలో ఎన్నికలు
ఇదీ చదవండి :నేపాల్ దారెటు? భారత్పై ప్రభావమెంత?
