గిల్గిత్​లో 'రిగ్గింగ్'​పై నిరసనలు హింసాత్మకం

ఎన్నికల్లో రిగ్గింగ్​ జరిగిందంటూ గిల్గిత్​-బాల్టిస్థాన్​లో నిరసనలు చెలరేగాయి. నాలుగు వాహనాలతో పాటు ఓ భవనానికి దుండగులు నిప్పంటించారు. ఈ ఘటనల్లో తమ కార్యకర్తలపై పోలీసులు దాడి చేశారని ఆరోపించింది పీపీపీ.

గిల్గిత్​-బాల్టిస్థాన్​ వీధులు నిరసనలతో హోరెత్తాయి. ఇటీవల జరిగిన ఎన్నికలకు సంబంధించి.. ఓ స్థానిక నియోజకవర్గంలో రిగ్గింగ్​ జరిగిందంటూ పాకిస్థాన్​ పీపుల్స్​ పార్టీ ఆందోళన చేపట్టింది. ఈ ఘటనలో నాలుగు వాహనాలతో పాటు అటవీశాఖకు చెందిన ఓ భవనానికి నిప్పంటించారు ఆందోళనకారులు.

తొలుత.. నిరసనకారులు, భద్రతా దళాల మధ్య ఘర్షణ చెలరేగిందని.. ఆ పరిణామాలు హింసాత్మక ఘటనకు దారితీశాయని అధికారులు వెల్లడించారు. ఈ ఘటనలో ఎవరు గాయపడలేదని పేర్కొన్నారు.

అయితే హింసాత్మక ఘటనల్లో తమ కార్యకర్తలపై పోలీసులు బాష్పవాయును ప్రయోగించారని ఆరోపించింది పీపీపీ. ఈ నేపథ్యంలో అనేక మంది కార్యకర్తలు గాయపడ్డారని తెలిపింది.

గత వారంలోనూ పాకిస్థాన్​ ఆక్రమిత ప్రాంతంలో ఇదే తరహా నిరసనలు చెలరేగాయి. గిల్గిత్​-బాల్టిస్థాన్​ ఎన్నికల్లో రిగ్గింగ్​ జరిగిందని ఆరోపించిన ఆందోళనకారులు.. రోడ్లపైకి వచ్చి నిరసనలు తెలిపారు.

ఇదీ చూడండి:-'ఇలా అయితే మేం పాకిస్థాన్​‌ నుంచి వెళ్లిపోతాం!'