Pak Taliban: 'కశ్మీర్​ విషయంలో పాక్​కు తాలిబన్ల సాయం!'

పాకిస్థాన్ సైన్యంతో తాలిబన్లు(Pak Taliban) సన్నిహిత సంబంధాలు కలిగి ఉన్నట్లు తేటతెల్లమైంది. ఓ టీవీ షోలో పాల్గొన్న పాక్ అధికార పార్టీ నేత చేసిన వ్యాఖ్యలే ఇందుకు నిదర్శనం. కశ్మీర్​ విషయంలో పాక్​కు తాలిబన్లు సాయం చేస్తారని ఆమె చేసిన వ్యాఖ్యలు దుమారం రేపుతున్నాయి.

పాకిస్థాన్​ సైన్యానికి తాలిబన్లకు(Pak Taliban) ఎంతటి సన్నిహిత సంబంధాలున్నాయో ఆ దేశ అధికార పార్టీ నేత చేసిన వాఖ్యలు స్పష్టం చేస్తున్నాయి. ఓ టీవీ షోలో పాల్గొన్న పాకిస్థాన్ తెహ్రీక్​-ఇ-ఇన్సాఫ్​ పార్టీ నాయకురాలు నీలం ఇర్షద్ షేక్​.. కశ్మీర్ విషయంలో తాలిబన్లు పాక్​కు అండగా ఉంటారని చెప్పారు.

'మాతో చేతులు కలుపుతామని తాలిబన్లు చెప్పారు. కశ్మీర్​ విషయంలో సాయం చేస్తామని ప్రకటించారు' అని నీలం షేక్ అన్నారు. వెంటనే టీవీ షో యాంకర్​ అప్రమత్తమయ్యారు. 'మేడం మీరు ఏం మాట్లాడుతున్నారో అర్థమవుతుందా? ఆలోచించే ఈ స్టేట్​మెంట్ ఇచ్చారా? ఈ షో ప్రపంచం మొత్తం వీక్షిస్తుంది. భారత్​ కూడా ఈ కార్యక్రమాన్ని చూస్తుంది' అని యాంకర్​ నీలం షేక్​కు సూచించారు. అయినా ఆమె తన వ్యాఖ్యలపై ఆందోళన చెందలేదు. తాలిబన్లు పాక్​కు సాయం చేస్తారని మరోసారి స్పష్టం చేశారు.

అయితే కశ్మీర్​ విషయంలో తాము జోక్యం చేసుకోమని తాలిబన్లు(Afghan Taliban) ఇప్పటికే ప్రకటించారు. అది భారత్ అంతర్గత విషయమని, ద్వైపాక్షిక సమస్య అని చెప్పారు.

పాకిస్థాన్​, దాని నిఘా విభాగం అండదండలతోనే తాలిబన్లు బలపడ్డారని అఫ్గాన్ ప్రభుత్వం గతంలో ఆరోపించింది.

ఇదీ చూడండి:తాలిబన్ల చేతికి 15 లక్షల మంది బయోమెట్రిక్ డేటా!