5 నెలల తర్వాత పాక్​లో మోగిన బడి గంటలు

కరోనా మహమ్మారి కారణంగా నిలిచిపోయిన పాఠశాలలు, కళాశాలలు, వ్యాపారాలు నెమ్మదిగా తెరుచుకుంటున్నాయి. పాకిస్థాన్​లో 5 నెలల తర్వాత బడులు, విశ్వవిద్యాలయాలు నేడు తెరుచుకున్నాయి. భౌతిక దూరం సహా కఠిన నిబంధనల నడుమ విద్యాలయాలను తెరిచింది ప్రభుత్వం. అయితే పాఠశాలల పునఃప్రారంభంతో కేసుల సంఖ్య గణనీయంగా పెరిగే అవకాశం ఉందని నిపుణులు హెచ్చరిస్తున్నారు.

కరోనా కేసులు క్రమంగా తగ్గుతున్న నేపథ్యంలో పాకిస్థాన్​ సర్కార్ మంగళవారం​ విద్యాలయాలను పునః ప్రారంభించింది. తొలి దఫాలో భాగంగా ఉన్నత పాఠశాలలు, కళాశాలలు, విశ్వవిద్యాలయాలను తిరిగి తెరిచింది.

ఆరవ తరగతి నుంచి ఎనిమిదవ తరగతి విద్యార్థులకు సెప్టెంబర్​ 23 నుంచి తరగతులు ప్రారంభమవుతాయి. ప్రాథమిక పాఠశాలలు సెప్టెంబర్​ 30 నుంచి మొదలుకానున్నాయి. కరోనా మహమ్మారి కారణంగా దాదాపు 5 నెలల తర్వాత పాఠశాలలు తెరుచుకున్నాయి.

నిబంధనలు...

• ఆరోగ్యశాఖ నిబంధనల ప్రకారం తరగతి గదిలో కేవలం 20 మంది విద్యార్థులనే అనుమతిస్తున్నారు.
• విద్యార్థులను రెండు బృందాలుగా విభజించి ప్రత్యామ్నాయ రోజుల్లో పాఠశాలకు వచ్చేలా ప్రణాళిక సిద్ధం చేశారు.
• విద్యార్థులు, ఉపాధ్యాయులు మాస్కులు తప్పనిసరిగా ధరించాలి.
• ప్రవేశ ద్వారాల్లో తప్పనిసరిగా శానిటైజర్లు, హ్యాండ్​ వాషింగ్​ సదుపాయాలు ఉండాలి.

కేసులు...

పాక్​లో కొత్తగా 404 కరోనా కేసులు నమోదయ్యాయి. ఆరుగురు చనిపోయారు. మొత్తం కేసుల సంఖ్య 3,02,424కు పెరిగింది. మృతుల సంఖ్య 6,389కి చేరింది.

వివిధ దేశాల్లో కేసుల వివరాలు....

దేశం	కేసులు	మరణాలు
అమెరికా	6,751,113	199,148
బ్రెజిల్​	4,349,544	132,117
రష్యా	1,073,849	18,785
పెరూ	733,860	30,812
కొలంబియా	721,892	23,123