ఫైనాన్షియల్ యాక్షన్ టాస్క్ ఫోర్స్ సమావేశం అక్టోబర్లో జరగనుంది. ఈ తరుణంలో ఉగ్రవాదాన్ని పెంచి పోషించినందుకు దాయాది దేశం మూల్యం చెల్లించుకోక తప్పదని నిపుణులు విశ్లేషిస్తున్నారు. ముష్కర మూకలకు ఆశ్రయం కల్పిస్తూ.. వారికి నిధులు సమకూరుస్తున్న 'ఇస్లామాబాద్' ఉగ్రవాద కార్యకలపాలకు బాధ్యత వహించాల్సిందేనంటున్నారు.
ఈటీవీ భారత్ ముఖాముఖిలో.. పాక్ ఎఫ్ఏటీఎఫ్ బ్లాక్లిస్ట్లోకి వెళ్లక తప్పదనే అభిప్రాయం వ్యక్తం చేశారు విదేశీ వ్యవహారాల నిపుణులు సువ్రో కమల్ దత్తా.
"పాకిస్థాన్ ఉగ్రవాదాన్ని పెంచి పోషిస్తోంది, భారత్పై దాడులు చేసేందుకు ముష్కర మూకలకు సహకరిస్తోంది. భవిష్యత్తులోనూ ఇదే కొనసాగిస్తుంది. గత 30-35 ఏళ్లుగా ఉగ్రవాదుల్ని అడ్డుపెట్టుకుని భారత్పై యుద్ధం చేస్తోంది. ఉగ్రవాదానికి ఎగుమతిదారుగా మారిన పాక్ భవిష్యత్తులోనూ ఇదే పంథా కొనసాగిస్తుంది."
-సువ్రో కమల్ దత్తా, విదేశీ వ్యవహారాల నిపుణులు
కేరళ, బంగాల్లలో ముష్కరులు ఎన్ఐఏ చేతికి చిక్కటం కొత్తేం కాదని.. గతంలో పట్టుబడిన ఉగ్రవాదులందరూ పాకిస్థాన్లోని ఇంటర్-సర్వీస్ ఇంటెలిజెన్స్(ఐఎస్ఐ)తో సంబంధాలు కలిగి ఉన్నవారేనని గుర్తుచేశారు కమల్ దత్తా. భారత్లో అశాంతి రాజేయటమే వారి లక్ష్యమని.. భవిష్యత్తులోనూ ఇలాంటి సంఘటనలు పునరావృతం అవుతాయంటున్నారు. పాకిస్థాన్ అజెండా సైతం ఇదేనని చెప్పుకొచ్చారు.
పాకిస్థాన్ తన మనుగడ కోసం భారత్లో సమస్యలు సృష్టిస్తోందని.. ముఖ్యంగా జమ్ముకశ్మీర్ అంశాన్ని అందుకే పదేపదే లేవనెత్తుతోందంటున్నారు దత్తా.
"పాకిస్థాన్ ప్రపంచానికి తాము ఉగ్ర స్థావరాలను తుడిచిపెడుతున్నాము, తమ గడ్డకు ఉగ్రవాదం నుంచి విముక్తి కల్పించేందుకు పాటుపడుతన్నామని చెప్పందుకు ప్రయత్నిస్తోంది. కానీ అలాంటిదేం జరగట్లేదు. పైగా ఉగ్రవాదులను పట్టుకునేందుకు సాయశక్తులా ప్రయత్నిస్తున్నామని.. ఉపేక్షించే ప్రసక్తే లేదని ప్రగల్భాలు పలుకుతోంది. ప్రపంచాన్ని మభ్యపెట్టేందుకే ఈ ప్రయత్నాలు."
-సువ్రో కమల్ దత్తా, విదేశీ వ్యవహారాల నిపుణులు
పాక్ అజెండా స్పష్టంగా ఉందని.. ఉగ్రదేశంగా ముద్ర పడకుండా ఉండేందుకే ఉగ్రవాద కార్యకలపాలకు వ్యతిరేకంగా పోరాడుతున్నామని చెబుతుందంటున్నారు దత్తా. కానీ, ఇప్పటివరకు ఎటువంటి చర్యలు తీసుకోకపోగా.. పాక్ గడ్డపై ఆశ్రయం పొందుతూ భారత్లో విధ్వంసానికి రహస్య కార్యాచరణ రూపొందిస్తున్నా చూసీచూడనట్లు వదిలేస్తోందని విమర్శిస్తున్నారు.
"ఈ కారణంగా అంతర్జాతీయంగా.. ముఖ్యంగా ఎఫ్ఏటీఎఫ్ సమావేశంలో పాక్ వక్రబుద్ధిని భారత్ బయటపెట్టాలి. అదే సమయంలో ఎఫ్ఏటీఎఫ్ పాక్ను బ్లాక్లిస్ట్లో చేర్చేలా చర్యలు తీసుకోవాలి."
-సువ్రో కమల్ దత్తా, విదేశీ వ్యవహారాల నిపుణులు
ఈ నేపథ్యంలో ఉగ్రవాదంపై పాక్ ద్వంద్వ విధానాలను పలు నివేదికలు బయటపెడుతున్నాయి. ఓవైపు ఎఫ్ఏటీఎఫ్ కత్తి మెడపై వేలాడుతున్నా.. అదేం పట్టించుకోకుండా ఉగ్రవాదులకు ఆశ్రయం కల్పిస్తోంది. అండవరల్డ్ డాన్ దావూద్ ఇబ్రహీం, పాక్ కేంద్రంగా పనిచేసే ఖలిస్థాన్ జిందాబాద్ ఫోర్స్ ఉగ్రవాది రంజీత్ సింగ్ నీతా వంటి వారిని దేశంలోనే మహరాజుల్లా చూసుకుంటోంది. ఇలాంటి పరిస్థితుల్లో అంతర్జాతీయ సమాజం పాక్ వైఖరిపై ఆందోళన వ్యక్తం చేస్తోనట్లు తెలుస్తోంది.
"చాలా కాలంగా పాక్ గ్రే జాబితాలోనే ఉంది. నా దృష్టిలో ఆ దేశం ఎఫ్ఏటీఎఫ్ నిర్దేశించిన లక్ష్యాలను అందుకోవటంలో విఫలమైంది కాబట్టి ఆ జాబితా నుంచి తొలగించాలి. ఆ దేశంపై చర్యలు తీసుకోకుండా ఉండాలంటే పాక్ తన తప్పులు సరిదిద్దుకోవాలి. ముందుగా ఉగ్రవాదానికి నిధులు అందించటం, మాదక ద్రవ్యాలు, వాటితో ఉగ్రవాదుల సంబంధాలపై చర్యలు తీసుకునేలా చూడాలి. అలాగే, ముంబయి పేలుళ్లు, పార్లమెంట్పై దాడికి సూత్రదారులు, వరల్డ్ ట్రేడ్ సెంటర్పై దాడికి బాధ్యులు, లండన్ ట్యూబ్ రైల్ పేలుళ్లకు పాల్పడ్డవారిపై కఠిన వ్యవహరించేలా ఒత్తిడి పెంచాలి. పాకిస్థాన్ ఈరోజు వరకు లష్కరే తొయిబా. హర్కతుల్ అన్సర్, జైషే మహమ్మద్ సంస్థలపై ఎటువంటి చర్యలు తీసుకోలేదు."
-సువ్రో కమల్ దత్తా, విదేశీ వ్యవహారాల నిపుణులు
అంతర్జాతీయంగా పలు దేశాలు గుర్తించిన బ్లాక్లిస్ట్లోని ఉగ్రసంస్థలు, ఐరాస గుర్తించిన అంతర్జాతీయ ఉగ్రవాదులపై కఠిన చర్యలు తీసుకోవాలని ఎఫ్ఏటీఎఫ్ పాక్కు సూచించింది. కానీ, పాక్ ఇప్పటివరకు ఎటువంటి ప్రయత్నాలు చేసిన దాఖలాలు లేవు. ఇప్పటికే అంతర్జాతీయ సమస్యగా మారిన ఉగ్రవాదంపై నిర్ణయాలకు పాకిస్థాన్కు చాలా సమయమిచ్చిందని, ఇక ఎట్టి పరిస్థితుల్లో పాక్ను బ్లాక్లిస్ట్లోకి చేర్చాల్సిందేనని దత్తా డిమాండ్ చేస్తున్నారు.
మొత్తంగా పాకిస్థాన్ ప్రభుత్వం 21మంది ఉగ్రవాదులకు వీఐపీ భద్రతతో ఆశ్రయం కల్పిస్తున్నట్లుగా తెలుస్తోంది. భారత్ ఇప్పటికే ఉగ్రవాదంపై పాకిస్థాన్ ద్వంద్వ వైఖరిని అంతర్జాతీయ వేదికలపై అనేక సార్లు బయటపెట్టింది. భారత్లో దాడులకు తెగబడేందుకు ముష్కర మూకలకు శిక్షణనిస్తూ.. వారికి ఆయుధాలు సరఫరా చేస్తుందని స్పష్టం చేస్తోంది.
ఇదీ చూడండి:దావూద్ సహా 21 మంది ఉగ్రవాదులకు పాక్ వీఐపీ భద్రత!
ఆర్మీ నివేదికల ప్రకారం గత నెలలో పాకిస్థాన్.. మరో 88మంది ఉగ్రసంస్థలకు చెందిన నేతలు, సభ్యులపై కఠిన ఆంక్షలు విధించామని యూఎన్ భద్రతామండలికి వెల్లడించింది. ఈ తరహా చర్యలు చేపడుతూ పాక్.. ఎఫ్ఏటీఎఫ్ నిషిద్ధ జాబితా నుంచి తప్పించుకునేందుకు తంటాలు పడుతోంది. అందుకే ఆంక్షలు అని చెబుతున్నా.. ఎటువంటి చర్యలు తీసుకున్నారో బయటకు వెల్లడించడం లేదు. అక్టోబర్లో జరిగే ఫైనాన్షియల్ యాక్షన్ టాస్క్ ఫోర్స్ సమావేశంలో తమపై చర్యలు తీసుకోకుండా ఉండేందుకు బిల్లులు సైతం ప్రవేశపెడుతోంది.
ఇదే ధోరణితో అంతర్జాతీయ సమాజాన్ని మభ్యపెట్టేందుకు.. భారత పౌరులు కొంతమందిని అంతర్జాతీయ తీవ్రవాదులుగా గుర్తించాలని మొరపెట్టుకుంటోంది. మొత్తంగా పాక్లో నక్కిన ఉగ్రవాదులు, వారి స్థావరాలు, కార్యకలపాలపై.. పాక్ ప్రభుత్వం, సైన్యం, ఐఎస్ఐకు పూర్తి అవగాహన ఉందంటున్నారు విశ్లేషకులు.
పాకిస్థాన్ 2018 జూన్ నుంచి గ్రే జాబితాలో కొనసాగుతోంది. జూన్ 2020లోపు నిర్దేశిత చర్యలు చేపట్టాలని ఎఫ్ఏటీఎఫ్ ఫిబ్రవరిలోనే హెచ్చరికలు జారీ చేసింది. అలాగే, ఉగ్రకార్యకలాపాలను పర్యవేక్షించే ఆసియా-పసిఫిక్ గ్రూప్.. ఏపీజీ సైతం సెప్టెంబర్ 15-16న నిర్వహించిన వర్చువల్ సమావేశంలో ఉగ్రవాద నిర్మూలనకు, నిధులకు అడ్డకట్ట వేయటంలో పని పనితీరుపై అసంతృప్తి వ్యక్తం చేసింది. 27 అంశాల కార్యాచరణ ప్రణాళికలో.. ఇంకా 13 అంశాలపై చర్యలు తీసుకోలేని స్పష్టం చేసింది. అయితే, చైనా.. పాకిస్థాన్కు అండగా నిలబడింది.
ఇదీ చూడండి:ఉగ్రవాదులపై పాక్ కొరడా- 88 సంస్థలపై కఠిన ఆంక్షలు
