కరోనా కేసుల్లో చైనాను దాటిన పాక్​

ప్రపంచవ్యాప్తంగా కరోనా విజృంభణ కొనసాగుతోంది. పొరుగుదేశం పాక్​లో అంతకంతకూ విస్తరిస్తోన్న మహమ్మారి ధాటికి.. అక్కడ బాధితుల సంఖ్య చైనాను అధిగమించింది. పాక్​లో ఇప్పటివరకు 85,246 మందికి వైరస్​ సోకగా.. 1,770 మంది మృతిచెందారు.

పాకిస్థాన్​లో కరోనా విజృంభణ కొనసాగుతూనే ఉంది. అంతకంతకూ పెరిగిపోతోన్న కేసులతో చైనాను అధిగమించింది దాయాది దేశం​. 24 గంటల వ్యవధిలో మరో 4,688 మంది వైరస్​ బారినపడ్డారు. ఫలితంగా మొత్తం బాధితుల సంఖ్య 85,246కు చేరింది. మరో 82 మంది మృతి చెందగా.. మొత్తం మరణాల సంఖ్య 1,770 కు పెరిగింది. 30 వేల మందికిపైగా కోలుకున్నారు.

84,160 వైరస్​ కేసులతో చైనా ప్రపంచవ్యాప్తంగా 18వ స్థానంలో ఉంది. తాజా కేసులతో పాక్(17).. చైనాను దాటిపోయిందని జాన్​ హాప్కిన్స్​ విశ్వవిద్యాలయ గణాంకాలు వెల్లడిస్తున్నాయి.

పాక్​లోని వివిధ రాష్ట్రాల్లో కొవిడ్​ కేసులు ఇలా..

వరుస

సంఖ్య

రాష్ట్రం నమోదైన కేసులు 1 సింధ్ 32,910 2 పంజాబ్ 31,104 3 ఖైబర్​ పఖ్తుంఖ్వా 11,373 4 బలూచిస్థాన్ 5,224 5 గిల్గిట్​-బాల్టిస్థాన్ 824 6 పాక్​ ఆక్రమిత కశ్మీర్ 285

పాక్​లో గడచిన 24 గంటల్లో 20,167 మందికి కొవిడ్​ పరీక్షలు నిర్వహించారు. ఇప్పటివరకు దేశంలో 6,15,511 మందికి వైరస్​ టెస్ట్​లు పూర్తయ్యాయి.

ఇదీ చదవండి:కొవిడ్‌కు ముకుతాడు వేసిన మూడు దేశాలు