భారత్ నూతన చిత్రపటం చట్టవిరుద్ధం: పాక్

కేంద్ర హోంశాఖ తాజాగా విడుదల చేసిన భారత చిత్రపటాన్ని అంగీకరించబోమని పాక్​ తెలిపింది. పీవోకే, గిల్గిత్​-బాల్టిస్థాన్​లను భారత్​లో అంతర్భాగంగా చూపడాన్ని తప్పుబట్టింది పొరుగు దేశం.

జమ్ము-కశ్మీర్​ పునర్​వ్యవస్థీకరణ తర్వాత కేంద్ర హోంశాఖ విడుదల చేసిన సంపూర్ణ భారత చిత్రపటాన్ని తప్పుబట్టింది పొరుగు దేశం పాకిస్థాన్. ఈ మ్యాప్​ పూర్తిగా తప్పని, చట్టబద్ధంగా ఆమోదించలేమని తెలిపింది.

కేంద్రపాలిత ప్రాంతాలుగా అమల్లోకి వచ్చిన జమ్ము-కశ్మీర్‌, లద్ధాఖ్‌లతో కూడిన భారత నూతన చిత్రపటాన్ని కేంద్రం విడుదుల చేసింది. ఇందులో జమ్ము-కశ్మీర్​ కేంద్ర పాలిత ప్రాంతం (యూటీ)లో పాకిస్థాన్​ ఆక్రమిత కశ్మీర్​ (పీఓకే) భాగంగా ఉంది. లద్ధాఖ్​ కేంద్రపాలిత ప్రాంతంలో కార్గిల్​, లేహ్​ జిల్లాలతో పాటు గిల్గిత్​-బాల్టిస్థాన్​ అంతర్భాగమైంది. అవిభక్త రాష్ట్రంలోని మిగతా ప్రాంతమంతా జమ్ము-కశ్మీర్లో భాగంగా ఉంటుందని ప్రభుత్వం వివరించింది.

అయితే ఈ మ్యాప్​ ఐక్యరాజ్యసమితి భద్రతా మండలి తీర్మానాలకు వ్యతిరేకంగా ఉందని ఆరోపిస్తూ అధికారిక ప్రకటన విడుదుల చేసింది పాక్​. నూతన మ్యాప్​ను అంగీకరించమని ఆ దేశ విదేశాంగ కార్యాలయం తెలిపింది. జమ్ముకశ్మీర్​ను వివాదాస్పద ప్రాంతంగా ఐరాస గుర్తించిందని.. దీన్ని భారత ప్రభుత్వం మార్చలేదని వ్యాఖ్యానించింది.

ఇదీ చూడండి: 'భారత్​-ఆసియాన్​ దేశాల పరస్పర సహకారంతోనే ఆర్థికాభివృద్ధి'