పైలట్​ నిర్లక్ష్యంతోనే పాక్​ విమాన ప్రమాదం!​

పాక్​ విమాన ప్రమాదానికి ముందే పైలట్​ను​ తాము హెచ్చరించామని, అతను పట్టించుకోలేదని ఎయిర్ ట్రాఫిక్ కంట్రోల్​ వెల్లడించింది. కరాచీ విమానాశ్రయానికి 15 నాటికల్​ మైళ్ల దూరంలో ఉన్నప్పుడు 7వేల అడుగుల ఎత్తులో ఉండాల్సిన విమానం... 10వేల అడుగులకు పైనే ఉందని, అతివేగంతో ప్రయాణించిందని తెలిపింది. పైలట్​ మాత్రం తాను సంతృప్తితో ఉన్నట్లు చెప్పాడని పేర్కొంది.

పాకిస్థాన్​లోని కరాచీలో ఇటీవలే జరిగిన ఘోర విమాన ప్రమాద ఘటనకు సంబంధించి కీలక విషయాలను వెల్లడించింది ఎయిర్ ట్రాఫిక్ కంట్రోల్​(ఏటీసీ). కరాచీ విమానాశ్రయానికి 15 నాటికల్ మైళ్ల దూరంలో ఉన్నప్పుడే.. విమానం ఉండాల్సిన దానికన్నా ఎక్కువ ఎత్తులో ఉండటమే కాక, వేగంగా కూడా ఉన్నట్లు పైలట్​ను హెచ్చరించినట్టు తెలిపింది. పైలట్ మాత్రం తాను సంతృప్తిగా ఉన్నానని చెప్పి ఆ హెచ్చరికల్ని పట్టించుకోలేదని పేర్కొంది.

ఎయిర్ ట్రాఫిక్ కంట్రోల్ నివేదిక​ వివరాల ప్రకారం.. లాహోర్ నుంచి శనివారం మధ్యాహ్నం 1:05 గంటలకు విమానం బయలుదేరింది. 2:30గంటలకు కరాచీ విమానాశ్రయంలో ల్యాండ్ అవ్వాల్సి ఉంది. ఆ సమయానికి కరాచీ నుంచి 15 నాటికల్ మైళ్ల దూరంలోని మక్లి వరకు చేరుకుంది విమానం. 7వేల అడుగుల ఎత్తులో ప్రయాణించాల్సి ఉండగా, విమానం 10వేల అడుగులకు పైనే ఉంది. ఎత్తు తగ్గించుకోవాలని పైలట్​ను ఏటీసీ హెచ్చరించింది. ఆ అవసరం లేదని అతను పట్టించుకోలేదు.

ఆ తర్వాత కరాచీ విమానాశ్రయానికి 10 నాటికల్ మైళ్ల దూరంలో ఉన్నప్పుడు 3వేల అడుగుల ఎత్తులో ఉండాల్సిన విమానం, 7వేల అడుగుల ఎత్తుకు మించి ప్రయాణించింది. ఏటీసీ రెండోసారి పైలట్​ను హెచ్చరించింది. మరోసారి అతను పట్టించుకోలేదు. తాను పరిస్థితిని అదుపు చేయగలనని, ల్యాండింగ్​కు సిద్ధంగా ఉన్నట్లు బదులిచ్చాడు.

ఆ తర్వాత.. కొద్ది సేపటికే విమానం ల్యాండింగ్ విఫలమై కరాచీలోని జనావాసాల్లో కుప్పకూలింది. విమానంలో ఉన్న 99 మందిలో ఇద్దరు మాత్రమే ప్రాణాలతో బయటపడ్డారు. 97మంది చనిపోయారు.

ఈ ఘటనపై పాక్ పౌర విమాన శాఖ అధికారులు రూపొందించిన ప్రాథమిక నివేదికలో.. పైలట్​ మొదటి సారి ల్యాండింగ్​కు ప్రయత్నించినప్పుడు ఇంజిన్లు ముడు సార్లు కుదుపులకు గురయ్యాయని తెలిపారు. ఆ తర్వాత రెండోసారి ల్యాండింగ్​కు​ యత్నించినప్పుడు ప్రమాదం జరిగినట్లు తెలిపారు.