కరోనా ఆంక్షలతో పాక్​లో తెరుచుకున్న విద్యాసంస్థలు

ఆరు నెలల సుదీర్ఘ విరామం తర్వాత పాకిస్థాన్​లో అన్ని విద్యాసంస్థలు బుధవారం ప్రారంభమయ్యాయి. ప్రభుత్వ​, ప్రైవేటు పాఠశాలల్లో కరోనా వ్యాపించకుండా కఠిన చర్యలు తీసుకోవాలని ఆదేశించినట్లు అధికారులు వెల్లడించారు.

కరోనా కారణంగా పాకిస్థాన్​లో 6 నెలలుగా మూసివేసిన విద్యాసంస్థలు ఎట్టకేలకు తెరుచుకున్నాయి. బుధవారం నుంచి అన్ని విద్యా సంస్థలు ప్రారంభమయ్యాయి. అన్ని ప్రభుత్వ​, ప్రైవేటు పాఠశాల్లో కరోనా వ్యాప్తి చెందకుండా కఠిన ఆంక్షలతో కూడిన అనుమతులిచ్చినట్లు అధికారులు తెలిపారు. .

ప్రాథమిక పాఠశాలల్లో పెద్ద సంఖ్యలో విద్యార్థులు వారి పేర్లను నమోదు చేసుకున్నారని ఆ దేశ విద్యాశాఖ మంత్రి షఫ్కత్​ మహమూద్​ తెలిపారు. ఎక్కువ కాలం బడులను తెరవకపోవటం వల్ల విద్యార్థులు నష్టపోయారని అన్నారు. మహమ్మారి వ్యాప్తిని పూర్తిగా అధ్యయనం చేసిన తర్వాతే విద్యా సంస్థల పునఃప్రారంభానికి అనుమతినిచ్చినట్లు పేర్కొన్నారు.

మొదటి దశలో భాగంగా సెప్టెంబర్​ 15న విద్యా సంస్థలను ప్రారంభించింది పాక్​ ప్రభుత్వం. పాఠశాలకు చెందిన మొత్తం 171,436 మందికి తాజాగా కరోనా పరీక్షలు నిర్వహించగా వారిలో కేవలం 1 శాతం మంది వైరస్​ బారినపడినట్లు గుర్తించామని విద్యా శాఖ మంత్రి వెల్లడించారు. ఈ గణాంకాల ఆధారంగానే తిరిగి ప్రాథమిక పాఠశాలను ప్రారంభించాలని నిర్ణయించినట్లు తెలిపారు.

ఇప్పటి వరకు పాకిస్థాన్ వ్యాప్తంగా 3 లక్షల మందికి పైగా కరోనా బారిన పడగా..6,479 మంది మృతి చెందారు.