జమ్ముకశ్మీర్‌లోని పుల్వామాలో జరిగిన ఉగ్రదాడి తమ పనే అని అంగీకరించిన దాయాది దేశం పాకిస్థాన్‌ ఇప్పుడు మళ్లీ మాట మార్చింది. ఆ దాడికి తమకు ఎలాంటి సంబంధం లేదని.. తన వ్యాఖ్యలను వక్రీకరిస్తున్నారని పాక్ శాస్త్ర, సాంకేతిక వ్యవహారాల శాఖ మంత్రి ఫవాద్ చౌధురి తాజాగా చెప్పడం గమనార్హం. పుల్వామా దాడి తర్వాత పరిస్థితుల గురించే తాను ప్రస్తావించానంటూ ఫవాద్ బుకాయించారు. అసలేం జరిగిందంటే..
ఇదీ చూడండి: 'పుల్వామా దాడి ఇమ్రాన్ ప్రభుత్వ విజయం'
గతేడాది జమ్మూకశ్మీర్‌లోని పుల్వామాలో సీఆర్పీఎఫ్‌ కాన్వాయ్‌పై ఉగ్రదాడి జరిగి 40 మందికి పైగా జవాన్లు అమరులైన విషయం తెలిసిందే. ఈ దాడి వెనుక పాక్ హస్తం ఉందని భారత్ వాదిస్తుండగా.. పాక్ మాత్రం పదే పదే బుకాయిస్తూ వస్తోంది. అయితే నాటి దుశ్చర్యలో తమ ప్రమేయం నిజమేనని ఫవాద్ చౌధురి గురువారం ఆ దేశ పార్లమెంట్‌లో సంచలన వ్యాఖ్యలు చేశారు. 'భారత భూభాగంలోకి వెళ్లి మరీ ఆ దేశంపై దాడి చేశాం. పుల్వామా.. ఇమ్రాన్ నాయకత్వంలో ఈ దేశం సాధించిన ఘన విజయం. ఇందులో అందరూ భాగస్వాములే' అని ఫవాద్ అన్నారు. అభినందన్‌ విడుదలకు ముందు పాక్ అగ్ర నాయకత్వం కాళ్లు వణికాయన్న విపక్ష నేత సాదిఖ్‌ వ్యాఖ్యలకు బదులిస్తూ ఫవాద్ ఈ విధంగా పేర్కొన్నారు.