ఎఫ్​-16 విమానాలను వినియోగించలేదు: పాక్

భారత వాయుసేన యుద్ధ విమానాలను కూల్చేందుకు తాము అమెరికా తయారు చేసిన ఎఫ్​-16  విమానాలను వినియోగించలేదని పాకిస్థాన్​  సైన్యం తెలిపింది. ఎఫ్​-16ను ఉపయోగించిందని భారత్​ ఆధారాలతో సహా బయటపెట్టినా... అంగీకరించకుండా వక్రబుద్ధి చూపుతోంది పాక్​.

చేసిన తప్పును కప్పిపుచ్చుకోవడానికి పాకిస్థాన్​ మరోసారి ప్రయత్నిస్తోంది. భారత్​ వాయుసేన యుద్ధవిమానాలను కూల్చేందుకు తాము ఎఫ్​-16 విమానాలను వాడలేదని చెబుతోంది. చైనాతో సంయుక్తంగా రూపొందించిన జెఎఫ్-17 యుద్ధ విమానాన్ని వాడినట్లు పాక్ సైన్యం వివరణ ఇచ్చింది.

పాకిస్థాన్​ బాలాకోట్​లోని​ ఉగ్రస్థావరాలపై ఫిబ్రవరి 26న భారత వాయుసేన మెరుపు దాడులు నిర్వహించింది. బదులుగా భారత్​పైకి యుద్ధ విమానాలను ప్రయోగించింది పాక్​. ఈ దాడిని దీటుగా ఎదుర్కొన్న భారత బలగాలు పాక్ యుద్ధ విమానాలను నేలమట్టం చేశాయి. పాకిస్థాన్ ప్రయోగించిన ఎఫ్-16 యుద్ధ విమానానికి సంబంధించిన శకలాలను భారత భూభాగంలో సైన్యం గుర్తించింది. వాటిని ఆధారాలుగా ప్రపంచానికి చూపింది.

ఒప్పందం ప్రకారం ఎఫ్​-16ను యుద్ధ విమానంగా ఉపయోగించరాదని అమెరికా తెలిపింది. దీనిపై పాక్​ను వివరణ కోరింది.