భారత్​తో అణుయుద్ధానికైనా వెనుకాడం: ఇమ్రాన్​ఖాన్​

భారత్​-పాక్​ల మధ్య యుద్ధమే వస్తే.. అది అణుయుద్ధంగానే ముగుస్తుందని ఆ దేశ ప్రధాని ఇమ్రాన్​ఖాన్​ వ్యాఖ్యానించారు. లొంగిపోవాలా? స్వేచ్ఛ కోసం పోరాడాలా? అనే పరిస్థితే వస్తే.. పాక్​ అణుయుద్ధమే చేస్తుందని ఆయన స్పష్టం చేశారు.

అణ్వాయుధ దేశాలైన భారత్-పాక్​ల మధ్య యుద్ధమే వస్తే... అది సంప్రదాయబద్దమైన యుద్ధంగా మాత్రం ఉండబోదని పాకిస్థాన్​ ప్రధాని ఇమ్రాన్​ఖాన్​ వ్యాఖ్యానించారు. స్వేచ్ఛ కోసం అణుయుద్ధం చేయడానికి పాక్​ సిద్ధమేనని.. అల్​ జజీరాకు ఇచ్చిన ప్రత్యేక ఇంటర్య్వూ లో ఆయన పేర్కొన్నారు.

"అణ్వస్త్ర సంపన్న దేశాలైన భారత్​-పాక్​ల మధ్య యుద్ధమే వస్తే.. అది అణుయుద్ధంతోనే ముగుస్తుంది. ఓటమి ఒప్పుకొని లొంగిపోవాలా? స్వేచ్ఛ కోసం ప్రాణాలు పణంగా పెట్టాలా? అనే పరిస్థితే వస్తే పాక్.. ప్రాణాలే ధారబోస్తుంది."-ఇమ్రాన్​ఖాన్​, పాకిస్థాన్​ ప్రధాని.

శాంతియుత పరిష్కారం కోసమే

'కశ్మీర్​' సమస్యను శాంతియుతంగా పరిష్కరించుకోవడం కోసమే పాక్​ అంతర్జాతీయ వేదికలను ఆశ్రయిస్తోందని ఇమ్రాన్​ఖాన్​ స్పష్టం చేశారు. అందులో భాగంగానే ఉపఖండంలో చెలరేగుతున్న ఉద్రిక్తతలను తగ్గించడానికే తాము ఐక్యరాజ్యసమితి, మిగతా అంతర్జాతీయ వేదికలనూ ఆశ్రయించామని ఆయన పేర్కొన్నారు.

ఇప్పుడు చర్చలా?

ప్రస్తుతం కశ్మీర్ విషయంలో భారత్​-పాక్ మధ్య చర్చలు జరిగే అవకాశం లేదని ఇమ్రాన్​ స్పష్టం చేశారు.

భారత అంతర్గత విషయంలో..

జమ్ము కశ్మీర్​కు ప్రత్యేక హోదానిచ్చే ఆర్టికల్ 370ని భారత్​ రద్దు చేసింది. దీనిపై అభ్యంతరం వ్యక్తం చేస్తూ పాక్​ ఐక్యరాజ్యసమితిని ఆశ్రయించింది. అయితే కశ్మీర్ పూర్తిగా భారత అంతర్గత విషయమని అంతర్జాతీయ సమాజానికి భారత్ తేల్చిచెప్పింది. ఈ నేపథ్యంలో ఇరుదేశాల మధ్య ఉద్రిక్తతలు కొనసాగుతున్నాయి.

ఇదీ చూడండి:ఇంజినీర్లు కృషికి, సంకల్పానికి ప్రతిరూపాలు:మోదీ