భారత్​కు పాకిస్థాన్​​ బహిరంగ హెచ్చరికలు

పాక్​ అమరవీరుల దినోత్సవం సందర్భంగా భారత్​ను హెచ్చరించారు ఆ దేశ ఆర్మీ చీఫ్​ జనరల్ కమర్ జావేద్ బజ్వా. యుద్ధం వస్తే జాతి మొత్తం ఏకమై విజయం సాధిస్తుందని తెలిపారు.

పాకిస్థాన్​ ఆర్మీ చీఫ్​ జనరల్​ కమర్​ జావేద్​ బజ్వా.. భారత్​కు బహిరంగ హెచ్చరికలు చేశారు. భారత్​ దుశ్చర్యలకు పాల్పడితే.. వాటిని అడ్డుకుని విజయం సాధించే సామర్థ్యం తమకుందని వెల్లడించారు. పాకిస్థాన్​ అమరవీరుల దినోత్సవం సందర్భంగా ఆయన ఈ వ్యాఖ్యలు చేశారు.

దేశ కీర్తిని, సాయుధ దళాల శక్తి సామర్థ్యాలను తగ్గించేందుకు ప్రయత్నాలు జరుగుతున్నాయని.. వాటిని ఎదుర్కొంటామని ధీమా వ్యక్తం చేశారు బజ్వా.

"హైబ్రిడ్​ యుద్ధం పేరుతో మన మీద దాడి చేస్తున్నారు. దేశానికి అపకీర్తిని తెచ్చేందుకు, సాయుధ దళాల శక్తి సామర్థ్యాలను తగ్గించి, అలజడులు సృష్టించడమే దాని ముఖ్య లక్ష్యం. సవాళ్ల గురించి మాకు పూర్తిగా తెలుసు. జాతీ మొత్తం ఏకమై ఈ యుద్ధంలో విజయం సాధిస్తుంది."

--- జావేద్​ బజ్వా, పాక్​ ఆర్మీ చీఫ్​.

పాకిస్థాన్​ శాంతిని కోరుకునే దేశమని.. అయితే ఒకవేళ యుద్ధమే వస్తే.. దీటుగా జవాబు చెప్పే సత్తా తమకుందని స్పష్టం చేశారు బజ్వా. భారత్​ పేరు ఎక్కడా ప్రస్తావించకుండా ఈ వ్యాఖ్యలు చేశారు.

'బాలాకోట్​ను గుర్తుతెచ్చుకోండి'

అదే సమయంలో భారత్​పై తీవ్ర స్థాయిలో విరుచుకుపడ్డారు పాక్​ ఆర్మీ చీఫ్​. 1965లో జరిగిన యుద్ధంలో భారత్​ను ఓడించామన్నారు. 2019 బాలాకోట్​ వాయు దాడుల్లో భారత్​కు బుద్ధిచెప్పామన్నారు. ఫలితంగా తమ శక్తిపై ఎటువంటి సందేహాలు పెట్టుకోవద్దని వెల్లడించారు.

కశ్మీర్​ అంశాన్ని కూడా ప్రస్తావించిన బజ్వా.. ఆర్టికల్​ 370ని రద్దు చేసిన భారత్​ ఆ ప్రాంతంలో శాంతికి ప్రమాదం తెచ్చిపెట్టిందని మండిపడ్డారు.

ఇదీ చూడండి:-పాక్ ఆర్మీ చీఫ్​కు సౌదీలో ఘోర పరాభవం