గురునానక్ జయంతి ఉత్సవాలకు 600 మంది సిక్కులు

సిక్కు మత గురువు గురనానక్ 551వ జయంతి ఉత్సవాల సందర్భంగా దాదాపు 600 మంది భారతీయ సిక్కులు పాకిస్థాన్​ చేరుకున్నారు. వాఘా సరిహద్దు ద్వారా యాత్రికులు తమ ప్రాంతానికి చేరుకున్నారని అధికారులు వెల్లడించారు.

శుక్రవారం దాదాపు 600 మంది భారతీయ సిక్కులు వాఘా సరిహద్దు ద్వారా పాకిస్థాన్​ చేరుకున్నారు. సిక్కు మత గురువు గురునానక్ 551వ జయంతి ఉత్సవాల్లో పాల్గొనేందుకు భారతీయులు పాక్​కు ప్రయాణమయ్యారు.

నవంబర్​ 30న పాకిస్థాన్​ పంజాబ్​ ప్రాంతంలోని గురుద్వారా జన్మస్థానమైన​ నన్​కానా సాహిబ్ వద్ద ఈ జయంతి వేడుకలు జరగనున్నాయి.

" మొత్తంగా 602 మంది భారతీయ సిక్కులు పాకిస్థాన్​ చేరుకున్నారు. 10 రోజుల పాటు వారు నంకానా సాహిబ్​ ప్రాంతంలోని ఇతర గురుద్వారాలను కూడా సందర్శించనున్నారు. ఎవాక్యూ ట్రస్ట్ ప్రాపర్టీ బోర్డు(ఈటీపీబీ) ఛైర్మన్ డా. అమీర్ అమ్మద్ సూచనల మేరకు యాత్రికుల కోసం ప్రత్యేక రక్షణ బృందాన్ని ఏర్పాటు చేశారు".

-అసిఫ్ హష్మి, ఈటీపీబీ ప్రతినిధి.

పంజాబ్​ ఆరోగ్య శాఖ సిబ్బంది యాత్రికుల కొవిడ్​-19 పరీక్ష ఫలితాలను పరిశీలించారని హష్మి తెలిపారు. ప్రతి ఏటా దాదాపు 2000 మంది భారతీయ సిక్కులు పాకిస్థాన్​ వెళ్లేవారు కానీ ఈ ఏడాది కరోనా కారణంగా ఈ సంఖ్య చాలా మేరకు తగ్గింది.

ఇదీ చదవండి:బ్రిటన్ ప్రధాని బోరిస్​తో మోదీ సంభాషణ