ఉత్తరకొరియా, అమెరికా స్నేహబంధానికి మరింతగా బీటలు పడుతున్నాయి. ఈ ఏడాది అమెరికా అధ్యక్షుడు డొనాల్డ్ ట్రంప్- ఉ.కొరియా అధినేత కిమ్ జోంగ్ ఉన్ సమావేశం కావాల్సి ఉండగా.. తాజాగా ఆ భేటీపై స్పష్టతనిచ్చారు కిమ్ సోదరి కిమ్ యో జోంగ్. తన సోదరుడు అగ్రరాజ్యం అధ్యక్షుడిని కలవడం కష్టమేనని వెల్లడించారు. అమెరికా వైపు నుంచి ఆశించిన మేర ఫలితాలు రాకపోవడమే కారణమని ఆమె పేర్కొన్నట్లు ప్యాంగ్యాంగ్ అధికారిక మీడియా తెలిపింది. ప్రస్తుతం ఉత్తర కొరియాలో అత్యంత శక్తిమంతమైన మహిళగా ఉన్నారు యో జోంగ్.
రెండేళ్ల క్రితం సింగపూర్‌లో కిమ్-ట్రంప్ తొలిసారి సమావేశమై పలు కీలకమైన అంశాలపై చర్చలు జరిపారు. ఉత్తర కొరియా అణు కార్యక్రమాలను.. పూర్తిగా నిలిపివేయాలని అమెరికా ఒత్తిడి చేస్తుండగా, తమ దేశంపై ఆంక్షలు తొలగించాలని ప్యాంగ్యాంగ్ కోరుతోంది.