'మా క్షిపణి ప్రయోగాలపై చర్చిస్తే ఊరుకోం'

తమ క్షిపణి ప్రయోగాలపై ఐరాస భద్రతా మండలిలో చర్చిస్తే సహించేది లేదని హెచ్చరించింది ఉత్తర కొరియా. క్షిపణి ప్రయోగం ఐరాస తీర్మానాలకు విరుద్ధమని ఆరోపిస్తూ భద్రతా మండలిలో చర్చకు పిలుపునిచ్చిన పలు ఐరోపా దేశాలను ఉద్దేశించి ఈ వ్యాఖ్యలు చేసింది.

తమ దేశానికి సంబంధించిన ఆత్మ రక్షణ చర్యలపై ఐరాస భద్రతా మండలిలో ఎలాంటి చర్చ జరిగినా సంహించబోమని హెచ్చరించింది ఉత్తర కొరియా. ఇటీవల జరిపిన క్షిపణి ప్రయోగాన్ని ఉద్దేశిస్తూ ఈ వ్యాఖ్యలు చేసింది.

గత వారం ఉత్తరకొరియా జరిపిన క్షిపణి ప్రయోగంపైమంగళవారం చర్చించేందుకు భద్రతా మండలి సమావేశానికి పిలుపునిచ్చాయి బ్రిటన్​, ఫ్రాన్స్​, జర్మనీ దేశాలు. ఐరాస తీర్మానాలను కిమ్​ ప్రభుత్వం ఉల్లంఘించిందని ఆరోపించాయి.

ఇలాంటి సమావేశాల వల్ల తమ సార్వభౌమత్వాన్ని కాపాడుకునేందుకు మరిన్ని చర్యలు చేపట్టాలన్న కోరిక పెరుగుతుందని ఐరాసలోని ఉత్తర కొరియా రాయబారి కిమ్​ సోంగ్​ వ్యాఖ్యానించారు. అమెరికాతో అణు చర్చలను తెగతెంపులు చేసుకున్న రెండు రోజుల అనంతరం ఉత్తర కొరియా నుంచి ఈ హెచ్చరికలు వెలువడ్డాయి.