'భారత్​తో చర్చలకు ఇప్పట్లో అవకాశాల్లేవ్​'

భారత్​తో దొడ్డిదారి చర్చలకు అనుకూల పరిస్థితులు లేవన్నారు పాక్​ విదేశాంగ మంత్రి షా మహమ్మద్​ ఖురేషీ. దౌత్యపరమైన చర్చలకూ ఇప్పట్లో అవకాశం లేదని ఆయన మీడియాకు తెలిపారు.

భారత్​తో దౌత్యపరమైన చర్చలకు ఇప్పట్లో అవకాశం లేదని పాకిస్థాన్​ విదేశాంగ మంత్రి షా మహమ్మద్​ ఖురేషీ చెప్పారు. ఆయన తన సొంత పట్టణం ముల్తాన్​లో విలేకరుల సమావేశంలో మాట్లాడారు. భారత్​తో దొడ్డిదారి చర్చలకు సైతం అనుకూల పరిస్థితులు లేవన్నారు. భారత్​ సైతం ఇప్పటికీ ఇదే వైఖరితో ఉంది. ఉగ్రవాదం, చర్చలు ఒకే చోట ఉండవని పలు మార్లు దాయాది దేశానికి స్పష్టం చేసింది. ఉగ్రవాద నిరోధక చర్యలు తీసుకోవాలని హెచ్చరించింది.

ఇమ్రాన్​తో ఆర్మీ చీఫ్​ భేటీ..

పాకిస్థాన్​ సైనిక అధిపతి జనరల్​ జావేద్​ బజ్వా గురువారం.. ప్రధాని ఇమ్రాన్​ ఖాన్​తో సమావేశమయ్యారు. పాక్​ అంతర్గత, సరిహద్దు భద్రతా పరిస్థితుల్ని వారు చర్చించారని ప్రధాని కార్యాలయం ఓ ప్రకటన విడుదల చేసింది.

ఏళ్లు గడుస్తున్న కొద్దీ పాక్​-చైనాల మధ్య స్నేహం బలపడుతోందని పాక్​ ఎయిర్​చీఫ్​ మార్షల్​ ముజహిద్​ అన్వర్​ ఖాన్​ అన్నారు. రెండు దేశాల వైమానిక దళాల ఉమ్మడి వార్షిక విన్యాసాల ముగింపులో ఆయన మాట్లాడారు.