భారతీయులకు సారీ చెప్పిన ఆ దేశ ప్రధాని కుమారుడు

అనుచిత మీమ్​ను షేర్​ చేసి విమర్శలు ఎదుర్కొన్న ఇజ్రాయెల్ ప్రధాని కుమారుడు.. తాజాగా క్షమాపణలు చెప్పారు. అవగాహన లేకపోవడం వల్లే ట్వీట్ చేసినట్లు చెప్పుకొచ్చాడు. ఇందుకు క్షమాపణలు కోరుతున్నట్లు పేర్కొన్నాడు.

భారతీయులను ఉద్దేశించి చేసిన ట్వీట్​పై దుమారం చెలరేగడం వల్ల ఇజ్రాయెల్ ప్రధాని నెతన్యాహు కుమారుడు యైర్ నెతన్యాహు క్షమాపణలు చెప్పారు. సామాజిక మాధ్యమాల్లో యాక్టివ్​గా ఉండే 29 ఏళ్ల యైర్.. తన తండ్రి అవినీతి ఆరోపణల కేసులో ప్రాసిక్యూటర్ అయిన లియాత్ బెన్ అరీ ముఖాన్ని ఓ దేవత ఫొటోకు జతచేసి పోస్ట్ చేశారు. యైర్ ట్వీట్​ను భారతీయ నెటిజన్లు తీవ్రంగా తప్పుబట్టారు.

దీంతో స్పందించిన యైర్ నెతన్యాహు.. తన తప్పును తెలుసుకున్నట్లు చెప్పారు.

"ఇజ్రాయెల్​లోని రాజకీయ నేతలను విమర్శించే వ్యంగ్య పేజీ నుంచి ఈ మీమ్​ను ట్వీట్ చేశాను. హిందూ విశ్వాసానికి సంబంధించిన చిత్రం కూడా మీమ్​లో ఉన్నట్లు గ్రహించలేదు. కామెంట్ల రూపంలో భారతీయ స్నేహితులు తమ అభిప్రాయాలు చెప్పిన తర్వాత.. ట్వీట్​ను తొలగించాను. నేను క్షమాపణలు కోరుతున్నాను."

-యైర్ నెతన్యాహు, ఇజ్రాయెల్ ప్రధాని కుమారుడు

క్షమాపణ చెప్పడంపై కొందరు ఇజ్రాయెల్ పౌరులు యైర్​ను ప్రశంసించారు. బాధ్యతారాహిత్యంగా వ్యవహరించారని ఇంకొందరు విమర్శిస్తున్నారు.

ఇదీ చదవండి:దేశంలో తొలి డ్రోన్ శిక్షణ స్కూల్​ అక్కడే..