భారత్​తో చర్చలకు నేపాల్​ పిలుపు

ఓవైపు భారత భూభాగాలను తమ మ్యాప్​లో జోడించి ఆమోదించుకున్న నేపాల్​.. మరోవైపు సరిహద్దు వివాదాన్ని చర్చల ద్వారా పరిష్కరించుకుందామని పిలుపునిచ్చింది. భారత్​తో తమకు శత్రుత్వం లేదని వెల్లడించింది.

భారత్​తో సరిహద్దు వివాదాన్ని పరిష్కరించుకునేందుకు పిలుపునిచ్చింది నేపాల్​. పొరుగుదేశంతో తమకు ఎలాంటి శత్రుత్వం లేదని అధికార నేపాల్​ కమ్యూనిస్ట్​ పార్టీ ఛైర్మన్​, మాజీ ప్రధాని పుష్ప కమల్​​ దాహాల్​ వ్యాఖ్యానించారు.

"సరిహద్దు వివాదాన్ని చర్చలు, దౌత్యపరమైన విధానాలతో పరిష్కరించుకోవాలని తీర్మానించాం. భారత్​తో మాకు ఎలాంటి శత్రుత్వం లేదు. అన్ని పార్టీలు దీనిని తీవ్రంగా పరిగణిస్తున్నాయి."

-- పుష్ప కమల్​ దాహాల్​, నేపాల్​ మాజీ ప్రధాని.

భారత్‌ భూభాగాలైన లిపులేఖ్‌, కాలాపానీ, లింపియాధురా ప్రాంతాలను తమవిగా పేర్కొంటూ నేపాల్‌ రూపొందించినకొత్త మ్యాప్‌కు ఆ దేశ పార్లమెంట్‌ ఆమోదం తెలిపిన అనంతరం దాహాల్​.. ఈ వ్యాఖ్యలు చేయడం గమనార్హం.