తెలంగాణ

telangana

ETV Bharat / international

అమ్మాయి పుడుతుందని డౌట్.. అబ్బాయిలా మార్చేస్తానని గర్భవతి తలకు మేకు! - మగ బిడ్డ కోసం తలలో మేకు

Nail driven into woman's head: ఆమెకు ఇప్పటికే ముగ్గురు ఆడ పిల్లలు. నాలుగో కాన్పులోనూ అమ్మాయే పుడుతుందని అనుమానం. అదే జరిగితే భర్త వదిలేస్తాడని భయం. అందుకే ఓ నకిలీ బాబాను ఆశ్రయించింది. అతడి సలహాతో తలకు రెండు అంగుళాల మేకు కొట్టించుకుని ప్రాణం మీదకు తెచ్చుకుంది.

Nail driven into woman's head
గర్భవతి తలకు మేకు

By

Published : Feb 10, 2022, 2:14 PM IST

Updated : Feb 10, 2022, 4:36 PM IST

Nail driven into woman's head: కచ్చితంగా అబ్బాయి పుట్టాలంటే నదుటికి మేకు కొట్టుకోవాలని ఓ గర్భవతికి సూచించి, ఆమెను ప్రాణాపాయంలో పడేసిన నకిలీ బాబా​ కోసం పాకిస్థాన్​లోని పెషావర్ నగర పోలీసులు గాలిస్తున్నారు.

అమ్మాయి అబ్బాయిగా మారిపోతుందని..

పెషావర్​కు చెందిన బాధితురాలికి ఇప్పటికే ముగ్గురు ఆడ పిల్లలు ఉన్నారు. ఆమె ప్రస్తుతం గర్భవతి. మరోసారి అమ్మాయే పుడుతుందని చాలా భయపడేది. మగబిడ్డ పుట్టకపోతే వదిలేస్తానని ఆమె భర్త బెదిరించడం ఇందుకు ప్రధాన కారణం.

తలలో మేకు ఎక్స్​రే చిత్రం

నాలుగో కాన్పులోనూ అమ్మాయి పడుతుందన్న భయంతో క్షణమొక యుగంలా గడుపుతున్న ఆ మహిళ.. 'పరిష్కారం' కోసం తెగ వెతికింది. ఎవరో చెప్పగా.. ఓ 'బాబా' దగ్గరకు వెళ్లింది. ఆ నకిలీ బాబా ఓ అసాధారణమైన, ప్రాణాంతకమైన సలహా ఇచ్చాడు. నదుటిపై పదునైన మేకును దించితే.. గర్భంలో అమ్మాయి ఉన్నా అబ్బాయే పుడతాడని నమ్మబలికాడు. అతడు చెప్పినట్టే చేసింది ఆ మహిళ. తలలోకి రెండు అంగుళాల మేకు దిగగానే నొప్పితో విలవిల్లాడిపోయింది. ఆ మేకును బయటకు లాగేందుకు ఆమె కుటుంబసభ్యులు విఫలయత్నం చేశారు. హుటాహుటిన బాధితురాలిని పెషావర్​లోని లేడీ రీడింగ్ ఆస్పత్రికి తరలించారు.

ఆస్పత్రి సీసీటీవీ దృశ్యాలు పరిశీలిస్తున్న పోలీసులు

ఎక్స్​రే వైరల్​.. రంగంలోకి పోలీసులు..

న్యూరాలజిస్ట్ హైదర్ సులేమాన్ ఆమెకు చికిత్స చేశారు. ఆ మేకు పుర్రెలోకి చొచ్చుకెళ్లిందని, కానీ మెదడును తాకలేదని చెప్పారు. ఇలా ఎందుకు చేశారో ఆ మహిళ తనకు చెప్పగానే షాక్ అయ్యానని అన్నారు సులేమాన్. "మా ఇంటి దగ్గర్లో ఓ మహిళకు అల్ట్రాసౌండ్ స్కానింగ్ చేయిస్తే ఆడపిల్ల పుడుతుందని తేలింది. అయితే బాబా సూచన మేరకు ఆమె తలకు మేకు కొట్టించుకుంది. అప్పుడు ఆమెకు మగబిడ్డే పుట్టాడు" అని బాధితురాలు తనకు చెప్పినట్లు వెల్లడించారు సులేమాన్.

దర్యాప్తు చేస్తున్న పోలీసులు

ఈ మొత్తం వ్యవహారంపై పోలీసులకు ఎలాంటి ఫిర్యాదు అందలేదు. అయితే.. మహిళ తలలో మేకు ఉన్న ఎక్స్​రే ఫొటో వైరల్ అయింది. ఇది అధికారుల దృష్టికి వెళ్లగా పోలీసులు రంగంలోకి దిగారు. ఆస్పత్రికి వెళ్లి దర్యాప్తు చేపట్టారు. ఇంత జరిగినా పోలీసులకు ఎందుకు సమాచారం ఇవ్వలేదన్న కోణంలోనూ వైద్యులను ప్రశ్నించారు. పరారీలో ఉన్న నకిలీ బాబా కోసం గాలిస్తున్నారు.

ఎక్స్​ రే ను పరిశీలిస్తున్న పోలీసులు

తలకు మేకు బాధితురాలే కొట్టుకుందా లేక కుటుంబసభ్యుల్లో ఎవరైనా కొట్టారా అనే అంశంపై ఇంకా స్పష్టత లేదని చెప్పారు పోలీసులు. అయితే.. ఈ తతంగం అంతా ఆమె ఇంట్లోనే జరిగిందని వెల్లడించారు.

ఎక్స్​ రేలో స్పష్టంగా కనిపిస్తున్న మేకు

ఇదీ చూడండి:చలానా కోర్టులో కడతానన్నందుకు.. యువకుడిపై ట్రాఫిక్​ పోలీస్​ దాడి!

Last Updated : Feb 10, 2022, 4:36 PM IST

ABOUT THE AUTHOR

...view details