మయన్మార్‌లో కొత్త చట్టం- అడ్డొస్తే 20 ఏళ్ల జైలే!

మయన్మార్​లో ఆందోళనలను అణచివేసేందుకు అక్కడి పౌరుల హక్కులను కాలరాస్తూ.. కొత్త చట్టాన్ని తీసుకొచ్చింది సైనిక ప్రభుత్వం. ఈ చట్టం ప్రకారం.. నిరసనకారులకు 20ఏళ్ల జైలు శిక్ష  విధిస్తామని తీవ్రస్థాయిలో హెచ్చరించింది.

మయన్మార్​లో అధికారాన్ని చేజిక్కించుకున్న సైనిక ప్రభుత్వం.. అక్కడి పౌరుల వ్యక్తిగత హక్కులను హరించేలా ఓ కొత్త చట్టాన్ని ప్రవేశపెట్టింది. ఈ చట్టం ప్రకారం.. సాయుధ బలగాలకు ఆటంకం కలిగిస్తే 20 ఏళ్ల జైలు శిక్ష విధిస్తామని నిరసనకారులను హెచ్చరించింది. అంతేకాకుండా.. తిరుగుబాటు నాయకులపై ద్వేషపూరితమైన చర్యలకు పాల్పడితే దీర్ఘకాలం జైలుశిక్షతో పాటు జరిమానా విధిస్తామని సైనిక సర్కార్​ ప్రకటించింది. అక్కడ ఇంటర్నెట్‌ సేవలు పునరుద్ధరించిన కాసేపటికే.. మిలిటరీ వెబ్‌సైట్‌లో ఈ ప్రకటన వెలువడటం గమనార్హం.

ఆ దేశంలో ప్రజాస్వామ్య ప్రభుత్వాన్ని తొలగించి, ఆంగ్​ సాన్​ సూకీని నిర్బంధించిన నేపథ్యంలో కొద్దిరోజులుగా లక్షలాది మంది ఆందోళన బాటపట్టారు. ఈ క్రమంలో సైనిక నేత సెన్ జెన్ మిన్ యాంగ్ లయింగ్ ఈ రకమైన చట్టాన్ని తీసుకురావడం చర్చనీయాంశమైంది. ఆందోళనలను అణచివేసి నిరసన కారులను అడ్డుకునేందుకే ఈ రకమైన చర్యలకు పాల్పడుతోంది సైనిక ప్రభుత్వం.

మరింత ఉద్ధృతం..

నిర్బంధంలో ఉంచిన తమ ప్రియతమ నేత సూకీని విడుదల చేయడం సహా.. ప్రజాస్వామ్యాన్ని పునరుద్ధరించాలని డిమాండ్​ చేస్తూ నిరసన చేస్తున్నారు ఆందోళనకారులు. సోమవారంతో ఆమె నిర్బంధ గడువు ముగుస్తున్నప్పటికీ.. దేశంలో ఆందోళనలు పెద్ద ఎత్తున కొనసాగుతున్న నేపథ్యంలో మరోమారు పొడిగించారు. ఫిబ్రవరి 17 వరకు నిర్బంధంలోనే ఉంటారని ఆమె తరఫు న్యాయవాది ఖిన్​ మౌంగ్​ జా తెలిపారు. ఈ వార్తతో ఆందోళనలకు మరింత ఆజ్యం పోసినట్లయింది. దేశవ్యాప్తంగా నిరసనల్ని మరింత ఉద్ధృతం చేస్తూ.. 'తమ నేతలను విడుదల చేయాలని, అరెస్టులను ఆపాలనే నినాదాల'తో ప్లకార్డులు చేతపట్టి రోడ్డెక్కారు.

ఇదీ చదవండి:వార్తలకు డబ్బులిచ్చేలా గూగుల్ భారీ ఒప్పందం