'ఎన్నికలు జరిపి విజేతలకు పట్టం కడతాం'

మయన్మార్​లో సైనిక తిరుగుబాటుకు వ్యతిరేకంగా చేస్తోన్న ఆందోళనలు ఉద్ధృతమవుతోన్న వేళ.. మిలటరీ కమాండర్​ జనరల్​ మిన్​ ఆంగ్​ హ్లైంగ్​ మీడియాతో మాట్లాడారు. దేశాన్ని తమ అధీనంలోకి తీసుకున్న తరువాత ఆయన తొలిసారిగా మాట్లాడారు. కానీ ప్రజలు చేస్తోన్న నిరసనల గురించి ఒక్క మాట కూడా మాట్లాడలేదు.

మయన్మార్​లో సైనిక తిరుగుబాటుకు వ్యతిరేకంగా ఆందోళనలు జరుగుతోన్న నేపథ్యంలో మిలిటిరీ కమాండర్ ప్రజలనుద్దేశించి 20 నిమిషాల పాటు టీవీ​లో మాట్లాడారు. అయితే ప్రపంచవ్యాప్తంగా చర్చకు దారి తీస్తోన్న నిరసనల గురించి ఒక్క మాట కూడా మాట్లాడక పోవడం గమనార్హం. ​మయన్మార్​లో సైనిక ప్రభుత్వం ఏర్పడిన తర్వాత మిలిటిరీ కమాండర్​ మాట్లాడడం ఇదే తొలిసారి.

గత ఎన్నికల్లో జరిగిన మోసాల వల్లే సైన్యం దేశాన్ని అధీనంలోకి తీసుకుందని సీనియర్​ జనరల్​ మిన్​ ఆంగ్​ హ్లైంగ్​ తెలిపారు. గతంలో చెప్పినట్లుగా బలగాలే కొత్తగా ఎన్నికలను నిర్వహించి విజేతలకు రాజ్యాధికారాలు అప్పజెప్తామని అన్నారు. కరోనా సమయంలో వైరస్​ వ్యాప్తిని అడ్డుకునే దిశగా చేపట్టిన చర్యలను, దేశ ఆర్థిక వ్యవస్థను కాపాడేందుకు తీసుకున్న విధానాలను వివరించారు. సైన్యాధికారులు చేస్తోన్న ఈ ఆరోపణలను అక్కడి ఎన్నికల సంఘం ఇప్పటికే ఖండించింది.

రోజురోజుకు పెరుగుతోన్న నిరసనలు.. ప్రజాస్వామ్యం కోసం గతంలో చేసిన రక్త పోరాటాలను గుర్తు చేస్తున్నాయి. శనివారం వేలాది మంది ఆందోళనకారులు యాంగోన్‌లో సులె పగోడా కేంద్రంగా శాంతియుత ప్రదర్శనలు చేశారు. ఈ నిరసనలను అణిచివేసేందుకు సైన్యాధికారులు భారీగా బలగాలను మోహరిస్తున్నారు.

ఇదీ చూడండి:మయన్మార్​లో భగ్గుమన్న నిరసన జ్వాల