నేటి ఆధునిక కాలంలో చాలామందికి మొబైల్ ఫోన్ చేతిలో లేకపోతే క్షణం గడవదు. సమయం చూసుకోవడం మొదలు.. సమస్యల పరిష్కారం వరకు అన్నింటికి ఫోన్‌పైనే ఆధారపడుతున్నారు. ఈ క్రమంలో మనుషుల మధ్య మాటలు తగ్గిపోతున్నాయి. ఒంటరిగా ఉన్నా, జనాల మధ్య ఉన్నా చేతిలో మొబైల్ పట్టుకొని ప్రపంచాన్ని చూసే యూజర్లు.. తమ చుట్టూ ఏం జరుగుతుందో తెలుసుకోలేకపోతున్నారు. చరవాణితో ఎన్ని ఉపయోగాలు ఉన్నాయో అన్ని అనర్థాలున్నాయి. అందుకే దాన్ని పరిమితంగా.. ఇతరులకు ఇబ్బంది కలగకుండా.. మనం ఇబ్బందుల్లో పడకుండా వాడాలి. ఈ విషయంలో జపాన్ ప్రజలు ఇతర దేశాల కంటే ముందున్నారు. అక్కడి వారంతా మొబైల్ వాడకంలో కొన్ని నిబంధనలు పెట్టుకున్నారు. వాటిని తూచ తప్పకుండా పాటిస్తున్నారు. అవేంటంటే..
ప్రజా రవాణాలో ఫోన్ మాట్లాడటం నిషేధం
చాలామంది తమకు ఫోన్ కాల్‌ వచ్చిన వెంటనే ఎక్కడున్నామన్న సంగతి కూడా మర్చిపోయి తెగ మాట్లాడేస్తుంటారు. బస్సుల్లో, రైళ్లలో ప్రయాణిస్తున్నా పక్కవారికి ఇబ్బంది కలుగుతుందన్న విషయాన్ని కూడా గుర్తించరు. కానీ.. జపాన్‌లో అలా చేయరు. బస్సు, రైళ్లు ఎక్కగానే మొబైల్‌లో సౌండ్‌ పూర్తిగా తగ్గిస్తారు. ఇతరులకు ఎలాంటి ఇబ్బంది కలగకుండా ఫోన్ వాడతారు. ఎవరైనా ఫోన్‌లో మాట్లాడటం కనిపిస్తే వారిని వింతగా చూస్తారట.
వైర్‌లెస్‌ డివైజ్‌లకు నో
టెక్నాలజీ పెరుగుతున్న కొద్దీ.. కొత్త వస్తువులు ఆవిష్కృతమవుతున్నాయి. ఈ విధంగానే స్మార్ట్‌ మొబైల్స్‌ యూజర్ల కోసం వైర్‌లెస్‌ డివైజ్‌లు అందుబాటులోకి వచ్చాయి. మొబైల్‌ను చేతితో తాకకుండా బ్లూటూత్‌, వైర్‌లెస్‌ హెడ్‌ఫోన్స్‌తో ఫోన్‌లో మాట్లాడటం, పాటలు వినడం ఇప్పుడు సర్వసాధారణమైన విషయం. కానీ.. ఇప్పటికీ జపనీయులు ఇలాంటి వైర్‌లెస్‌ డివైజ్‌లు వాడటానికి ఇష్టపడట్లేదు. కాల్స్‌ వస్తే.. మొబైల్‌ను చేతిలో పట్టుకొని మాట్లాడటం లేదా ఇయర్‌ఫోన్స్‌ పెట్టుకొని మాట్లాడతారు. వెర్‌లైస్‌ డివైజ్‌ల సాయంతో ఫోన్ మాట్లాడితే.. తమకు తాము మాట్లాడుకునే పిచ్చివాళ్లలా భావిస్తారట అక్కడివాళ్లు. అందుకే వాటిని ఉపయోగించేవారు అరుదు.
వినాలంటే హెడ్‌ఫోన్స్‌ తప్పనిసరి
ప్రపంచవ్యాప్తంగా చాలామంది.. ఇంట్లో లేదా ప్రయాణిస్తున్నప్పుడు హెడ్‌ఫోన్స్‌ పెట్టుకోకుండా మొబైల్‌లో పాటలు, వీడియోలు ప్లే చేస్తుంటారు. దానివల్ల తోటివారికి ఇబ్బంది కలుగుతుందని కూడా ఆలోచించరు. అయితే.. జపాన్‌లో మాత్రం.. ఎట్టి పరిస్థితుల్లోనూ హెడ్‌ఫోన్స్‌ పెట్టుకునే పాటలు వినడం, వీడియోలు చూడటం చేస్తారట. పొరపాటున మొబైల్ ఫోన్‌కు హెడ్‌ఫోన్స్‌ సరిగా కనెక్ట్‌ కాకుండా శబ్దాలు బయటికి వస్తే.. అపరాధం చేసిన వారిలా బాధపడతారు. పక్కన ఉండే వారికి ఇబ్బంది కలిగినందుకు క్షమాపణ కూడా చెబుతారు.