Viral video: లిఫ్ట్​లో బెల్ట్​​ ఇరుక్కుని వేలాడిన శునకం

ఓ డెలివరీ ఏజెంట్​​ను నెటిజన్లు పొగడ్తలతో ముంచెత్తున్నారు. అతను 'హీరో' అంటూ ప్రశంసలు కురిపిస్తున్నారు. ఇంతకీ ఈ డెలివరీ ఏజెంట్​.. అందరి చేత 'హీరో' అనిపించుకునేంత పని ఏం చేశాడో తెలుసా?​ లిఫ్ట్​లో చిక్కుకున్న ​ఓ శునకాన్ని ప్రాణాపాయం నుంచి తప్పించాడు. ఈ వీడియో సోషల్​ మీడియాలో వైరలైంది.

అది ఓ అపార్ట్​మెంట్​లోని సీసీటీవీ ఫూటేజ్​. చైనాకు చెందిన స్థానిక మీడియా గత నెల 26న ఆ వీడియోను యూట్యూబ్​లో షేర్​ చేసింది. అది అప్​లోడైన కొన్ని నిమిషాలకే వైరల్​గా మారింది. ఆ వీడియోపై స్పందించిన నెటిజన్లు.. వీడియోలోని డెలివరీ బాయ్​ను భేష్​ అని మెచ్చుకుంటున్నారు. లిఫ్ట్​లో చిక్కుకుని ఉన్న కుక్కను కాపాడటమే అందుకు కారణం.

డోర్లు తెరుచుకుని ఉన్న లిఫ్ట్​లోకి ఓ పెంపుడు కుక్క వెళ్లింది. ఈ క్రమంలో ఆ శునకం మెడకు ఉన్న బెల్ట్​ లిఫ్ట్​ తలుపుల మధ్య ఇరుక్కుపోయింది. అదే సమయంలో లిఫ్ట్​ కిందకి వెళ్లడం వల్ల ఆ బెల్ట్​ కుక్క మెడకు బిగుసుకుపోయింది. కింద ఫ్లోర్​లోనే లిఫ్ట్​ కోసం ఎదురుచూస్తున్న డెలివరీ ఏజెంట్​కు.. లిఫ్ట్​ తలుపులు తెరుచుకోగానే మెడకు బెల్ట్​ బిగుసుకుపోయి విలవిల్లాడుతున్న కుక్క కనిపించింది. వెంటనే బెల్ట్​ను తీసేసి డెలివరీ బాయ్​ దాని ప్రాణాలు కాపాడాడు.

ఆ లిఫ్ట్​కు ఉన్న సీసీటీవీలో రికార్డ్​ అయిన ఈ వీడియోను చూసిన నెటిజన్లు డెలివరీ బాయ్​ చేసిన పనికి ఫిదా అయ్యారు. ఎలాంటి కంగారు లేని అతని వ్యక్తిత్వం తనకు నచ్చిందని.. ఇటువంటి వ్యక్తుల నుంచి చాలా నేర్చుకోవాలని ఓ నెటిజన్​ కామెంట్​ చేశారు.

"ఇతను నిజమైన హీరో. అసలు అతను ఎలాంటి కంగారు పడలేదు. ఆ కుక్కను కాపాడినందుకు సంబంధిత యజమాన్లు ఈ డెలివరీ ఏజెంట్​కు తగిన బహుమానం ఇచ్చారని ఆశిస్తున్నాను. ఒకవేళ ఇవ్వకపోతే మనమే ఓ అకౌంట్​ ఓపెన్​ చేసి అతనికి బహుమానం అందించాలి" అంటూ మరో నెటిజన్​ ప్రశంసించారు.

ఇదీ చూడండి :ప్రపంచంలోనే అతిపెద్ద ఆలుగడ్డ- బరువు 8 కిలోలు!