'ఏదైనా జరగొచ్చు.. అన్నింటికీ సిద్ధంగా ఉండండి'

నేపాల్​ ప్రధాని కేపీ శర్మ ఓలి.. శనివారం ఆ దేశ రాష్ట్రపతితో సమవేశమయ్యారు. అనంతరం తన మంత్రులతో భేటీ అయి సుదీర్ఘంగా చర్చలు జరిపారు. ప్రధానిగా ఓలి భవితవ్యం ప్రశ్నార్థకంగా మారిన తరుణంలో ఈ సమావేశాలకు ప్రాధాన్యం సంతరించుకుంది. అయితే.. తనను గద్దెదింపడానికి కుట్ర జరుగుతోందని.. మంత్రులు దేనికైనా సిద్ధంగా ఉండాలని ఓలి సూచించినట్టు సమాచారం.

తన రాజకీయ భవితవ్యం ప్రశ్నార్థకంగా మారిన తరుణంలో నేపాల్​ ప్రధానమంత్రి కే పీ శర్మ ఓలి శనివారం కీలక సమావేశాలు జరిపారు. తొలుత నేపాల్​ రాష్ట్రపతి బైద్యదేవీ భండారీతో భేటీ అయిన ఓలి.. అనంతరం తన మంత్రులతో సుదీర్ఘంగా చర్చలు జరిపారు. ఈ నేపథ్యంలో తనను గద్దె దించడానికి కుట్ర జరుగుతోందని.. అందువల్ల అందరూ దేనికైనా సిద్ధంగా ఉండాలని మంత్రులకు ఓలి తెలిపినట్టు సమాచారం.

"పార్టీ ఐకమత్యం ప్రమాదంలో పడింది. ఏదైనా జరగొచ్చు. రాష్ట్రపతికి, నాకు వ్యతిరేకంగా కొందరు కుట్ర పన్నుతున్నారు. మీరందరూ(మంత్రులు) ఓ స్పష్టతకు రావాలి. దేనికైనా సిద్ధంగా ఉండాలి."

-- కే పీ శర్మ ఓలి, నేపాల్​ ప్రధానమంత్రి.

భారత్​తో సరిహద్దు వివాదం నేపథ్యంలో ఓలి వైఖరిపై సర్వత్రా విమర్శలు ఎదురవుతున్నాయి. ఈ నేపథ్యంలోనే తనపై భారత్​ కుట్ర పన్నుతోందన్న ఓలి ఆరోపణలతో.. సొంత పార్టీ నుంచే ప్రధానికి తీవ్ర వ్యతిరేకత ఎదురైంది. ప్రధాని రాజీనామాకు పార్టీ సీనియర్​ నేతలు డిమాండ్​ చేస్తున్నారు. ఈ నేపథ్యంలో ఓలి భవితవ్యాన్ని తేల్చడానికి అధికార నేపాల్​ కమ్యూనిస్ట్​ పార్టీ శనివారం భేటీకావాల్సి ఉంది.కాని కొన్ని కారణలాతో సమావేశం సోమవారానికి వాయిదా పడింది.

ఇదీ చూడండి:-నేపాల్ ప్రధానికి ఎందుకీ 'రాజీ'నామా కష్టం?