దేశంలోకి కరోనా వస్తే మీరు అయిపోయినట్టే: కిమ్​

గత కొద్దిరోజులుగా ప్రపంచాన్ని వణికిస్తోన్న కరోనా​... శరవేగంగా చైనా నుంచి ఇతర దేశాలకు వ్యాపిస్తోంది. ఈ నేపథ్యంలో తమ దేశ అధికారులకు తీవ్ర హెచ్చరికలు చేశారు ఉత్తర కొరియా అధ్యక్షుడు కిమ్​. వైరస్​ వ్యాపిస్తే తీవ్రపరిణామాలు ఎదుర్కోవాల్సి వస్తుందని స్పష్టం చేశారు.

కిమ్​ జోంగ్​ ఉన్​... తన ప్రవర్తనతో నిత్యం వార్తల్లో ఉంటారు ఈ ఉత్తరకొరియా అధ్యక్షుడు. ఆయన తీసుకునే నిర్ణయాలు ప్రపంచ దేశాలనే వణికిస్తాయి. తాజాగా కరోనా వైరస్​ నేపథ్యంలో ఉత్తర కొరియా అధికారులకు తీవ్ర స్థాయిలో హెచ్చరికలు జారీ చేశారు కిమ్​. దేశంలోకి వైరస్​ ప్రవేసిస్తే... తీవ్ర పరిణామాలు ఎదుర్కోవాల్సి ఉంటుందని స్పష్టం చేశారు.

ఉత్తర కొరియాలో ఆరోగ్య ప్రమాణాలు అట్టడుగు స్థాయిలో ఉన్నాయి. ఫలితంగా వైరస్​ నేపథ్యంలో ఇప్పటికే తమ సరిహద్దులను మూసివేశారు కిమ్​.

వైరస్​కు వ్యతిరేకంగా పోరాటం చేయడం ప్రజల రక్షణ చర్యల్లో కీలక వ్యవహారమని కొరియా అధికార వర్కింగ్​ కమిటీ సమావేశంలో కిమ్​ అన్నారు. వేగంగా వ్యాపిస్తోన్న వైరస్​ తమ దేశంలో అడుగుపెడితే.. ఆ పరిణామాలు ఎలా ఉంటాయో అధికారులకు వివరించారు.

కరోనాతో పోరులో అవినీతికి పాల్పడినట్టు తెలియడం వల్ల ఇద్దరు సీనియర్​ అధికారులతో సహా పార్టీకి చెందిన ఓ విభాగాన్ని తొలగించారు కిమ్​.

చైనా-కొరియా...

ప్రపంచవ్యాప్తంగా 2,800 మందికి పైగా కరోనాతో ప్రాణాలు కోల్పోయారు. మరో 84 వేల మందికి ఈ వైరస్​ సోకింది. ఈ కేసులన్నీ అధిక భాగం చైనాలోనే ఉన్నాయి.

అయితే చైనాకు సమీపంలోని ఉత్తరకొరియాలో ఇప్పటి వరకు ఒక్క కేసు కూడా నమోదవ్వలేదు. దీనికి కారణం... ఆ దేశం ఇప్పటికే అంతర్జాతీయ రైల్వే, విమాన సేవలను నిలిపివేసి జాగ్రత్తలు చేపట్టింది. వందలాది మంది సందర్శకులను నిర్బంధంలో ఉంచింది.

ఇదీ చదవండి:కరోనాతో ప్రపంచం విలవిల.. 57 దేశాలకు వ్యాప్తి