కశ్మీరీలకు పాక్​లో 'ఉగ్ర'శిక్షణ: పర్వేజ్​ ముషారఫ్​

భారత సైన్యంతో పోరాడటానికి కశ్మీరీలకు పాకిస్థాన్​లో శిక్షణ ఇచ్చినట్లు ఆ దేశ మాజీ అధ్యక్షుడు పర్వేజ్ ముషారఫ్​ ఒప్పుకున్నారు. వారిని వీరులుగా అభివర్ణించారు. గతంలో ఓ ముఖాముఖిలో చెప్పిన ఈ విషయం తాజాగా వెలుగులోకి వచ్చింది.

జమ్ముకశ్మీర్​లో అలజడులు సృష్టించేందుకు పాకిస్థాన్​ ఉగ్రవాదాన్ని పెంచి పోషిస్తుందనేందుకు తిరుగులేని ఆధారం లభించింది. భారత సైన్యంతో పోరాడటానికి కశ్మీరీలకు​ పాకిస్థాన్​లో శిక్షణ ఇచ్చినట్లు ఆ దేశ మాజీ అధ్యక్షుడు పర్వేజ్ ముషారఫ్ ఒప్పుకున్నారు.

గతంలో ఓ ముఖాముఖిలో ఈ విషయం వెల్లడించారు ముషారఫ్​. ఆ వీడియోను పాక్​ రాజకీయ నేత పర్హాతుల్లా బాబర్​ ఇప్పుడు ట్విట్టర్​లో షేర్​ చేశారు.

"అఫ్గానిస్థాన్​ నుంచి సోవియట్​ను బయటకు పంపేందుకు, పాకిస్థాన్​కు లబ్ధి చేకూర్చేందుకు 1979లో అఫ్గాన్​లో మతపరమైన ఉగ్రవాదానికి బీజం వేశాం. ప్రపంచవ్యాప్తంగా ఉన్న ఇస్లామిక్​ ఉగ్రవాదుల్ని తీసుకొచ్చాం. వారికి శిక్షణ ఇచ్చాం. ఆయుధాలు సరఫరా చేశాం. వారు మా దృష్టిలో వీరులు. హక్కానీ, ఒసామా బిన్​ లాడెన్​ వీరులు. వాతావరణం అప్పటితో పోల్చితే ఇప్పుడు మారింది. హీరోలు విలన్లు అయ్యారు. కశ్మీర్​ నుంచి ఇక్కడికి వచ్చిన వారికి ఘన స్వాగతం లభించేది. వారికి మేము శిక్షణ ఇచ్చేవాళ్లం. భారత సైన్యంపై పోరాడే వీరులుగా మేము వారిని పరిగణించేవాళ్లం. తర్వాత లష్కరే తొయిబా వంటి ఎన్నో ఉగ్రవాద సంస్థలు పుట్టుకొచ్చాయి."

-పర్వేజ్​ ముషారఫ్​, పాక్​ మాజీ అధ్యక్షుడు

ఇదీ చూడండి : పండిట్​ నెహ్రూకు ట్విట్టర్​ వేదికగా మోదీ నివాళి