కరోనాకు వ్యాక్సిన్​ అభివృద్ధి దిశగా మరో అడుగు!

కరోనా వైరస్​లోని అణువులతో వ్యాక్సిన్​ను అభివృద్ధి చేసే అవకాశాలున్నాయని ఇజ్రాయెల్ పరిశోధకులు వెల్లడించారు. ఇందుకు సంబంధించిన అధ్యయనం ఎంపీడీఐ వ్యాక్సిన్స్ జర్నల్​లో ప్రచురితమైంది.

కరోనా వ్యాక్సిన్​కు సంబంధించి కీలక విషయాలు వెల్లడించారు ఇజ్రాయెల్ పరిశోధకులు. వైరస్​లోని అణువులకు రోగ నిరోధక వ్యవస్థను ప్రతిస్పందింపజేసి యాంటీబాడీలను ఉత్పత్తి చేయగల సామర్థ్యం ఉన్నట్లు గుర్తించారు. ఈ అణువులను కరోనా వ్యాక్సిన్ అభివృద్ధిలో ఉపయోగించవచ్చని తెలిపారు.

ఇజ్రాయెల్​లోని బార్​ ఇలాన్​ యూనివర్సిటీ(బీఐయూ) పరిశోధకుల అధ్యయనం ఎంపీడీఐ వ్యాక్సిన్స్​ జర్నల్​లో ప్రచురితమైంది. దీని ప్రకారం కరోనా వైరస్​లోని ప్రతిజనక అణువులను శాస్త్రవేత్తలు పరిశీలించారు. ఇవి రోగ నిరోధక ప్రతిస్పందనలో యాంటీబాడీలను ఉత్పత్తి చేయగలవు.

ప్రతిజనక అణువులోని ప్రోటీన్ ఏ స్థాయిలో ఉందో గుర్తించేందుకు బయోఇన్ఫర్మెటిక్స్ ఆధారిత గణన విధానాన్ని పాటించారు . రోగ నిరోధక వ్యవస్థను ప్రతిస్పందింపజేసే మొత్తం 25 ఎపిటోప్​లను వైరస్​లోని ప్రోటీన్లలో గుర్తించారు.

ప్రపంచవ్యాప్తంగా వైరస్ ప్రభావిత జనాభాలో 87 శాతానికి పైగా ఏడు ఎపిటోప్‌లు ఉన్నట్లు పరిశోధన బృందం తెలిపింది. బహుళ సాధనాల ద్వారా వీటిని పరీక్షించినట్లు పేర్కొంది. వ్యాక్సిన్​ అభివృద్ధికి ఇవి సమర్థంగా పనిచేస్తాయని వివరించింది.