త్వరలో భారత్​-పాక్​ విదేశాంగ మంత్రుల భేటీ!

భారత్​-పాక్ విదేశాంగ మంత్రులు త్వరలోనే సమావేశమయ్యే అవకాశమున్నట్టు తెలుస్తోంది. తజికిస్థాన్​లో జరిగే 'హార్ట్​ ఆఫ్ ఏషియా' సదస్సులో వీరిద్దరూ భేటీ అయ్యే అవకాశముందని ఊహాగానాలు జోరందుకున్నాయి.

తజకిస్థాన్​ వేదికగా త్వరలో భారత్​-పాకిస్థాన్​ విదేశాంగమంత్రులు సమావేశమయ్యే అవకాశాలు కనిపిస్తున్నాయి. 'హార్ట్​ ఆఫ్​ ఏషియా' సదస్సు కోసం పాక్​ విదేశాంగమంత్రి షా మహమ్మద్​ ఖురేషి త్వరలో తజకిస్థాన్​ వెళ్లనున్నారు. ఈ సదస్సుకు భారత​ విదేశాంగమంత్రి జై శంకర్​ హాజరయ్యే అవకాశం ఉండటం వల్ల ఇరువురి మధ్య సమావేశం జరుగుతుందని ఊహాగానాలు జోరందుకున్నాయి.

తజకిస్థాన్​ రాజధాని దుషంబే వేదికగా.. ఈ నెల 30న ఈ "9వ మినిస్ట్రల్​ కాన్ఫరెన్స్​ ఆఫ్​ ది హార్ట్​ ఆఫ్​ ఏషియా- ఇస్తాంబుల్​ ప్రాసెస్​" సదస్సు జరగనుంది. అయితే దీనికి జై శంకర్​ హాజరువుతారా? లేదా? విదేశాంగమంత్రుల మధ్య భేటీ ఉంటుందా? అన్న అంశాలపై స్పష్టత లేదు.

కానీ పాకిస్థాన్​కు చెందిన ఓ వార్తా సంస్థ మాత్రం.. ఈ సదస్సుకు ఇరువురు పాల్గొంటారని పేర్కొంది. ఫలితంగా వీరి భేటీ విషయంపై సర్వత్రా ఆసక్తి నెలకొంది.

భేటీ సాధ్యమే!

భారత్​-పాక్​ మధ్య సంబంధాలు అంతంత మాత్రంగానే ఉన్నాయి. కానీ కొన్ని రోజులుగా పరిస్థితుల్లో కొంత మార్పు కనపడుతోంది. నియంత్రణ రేఖ వెంబడి కాల్పుల విరమణ ఒప్పందాన్ని కఠినంగా అమలు చేసేందుకు ఇరు దేశాల సైనిక అధికారులు గత నెలలో ఓ అంగీకారానికి వచ్చారు. ఆ తర్వాత.. పాక్​ ప్రధాని ఇమ్రాన్​ ఖాన్​తో పాటు ఆ దేశ ఆర్మీ జనరల్​ ఖమర్​ జావేద్​ బాజ్వా.. భారత్​తో సంబంధాల పునరుద్ధరణపై మాట్లాడారు. గతాన్ని విడిచిపెట్టి ముందుకు సాగాలని కోరారు.

ఈ పరిణామాల నేపథ్యంలో.. తజకిస్థాన్​లో జరగనున్న సదస్సులో భాగంగా భారత్​-పాక్​ విదేశాంగమంత్రులు భేటీ అసాధ్యం కాదని పాక్​ అధికారులు, రాజకీయ నిపుణులు భావిస్తున్నారు.

ఇవీ చూడండి: