'దేశాల మధ్య సహకారంతో ప్రచ్ఛన్న యుద్ధానికి ముగింపు'

క్వాడ్​ను ఉద్దేశిస్తూ రష్యా విదేశాంగ మంత్రి సెర్జే లావ్​రొవ్ చేసిన వ్యాఖ్యలను తప్పుబట్టారు భారత విదేశాంగ మంత్రి ఎస్. జైశంకర్. నాలుగు దేశాల కూటమిని 'ఆసియా నాటో' అనడంపై అభ్యంతరం వ్యక్తం చేశారు.

ఇండో-పసిఫిక్ దేశాల మధ్య సహకారం ప్రచ్ఛన్న యుద్ధానికి ముగింపు పలుకుతుందని భారత విదేశాంగ మంత్రి ఎస్.జైశంకర్ అభిప్రాయపడ్డారు. క్వాడ్ దేశాల సత్సంబంధాలపై విమర్శలు వెల్లువెత్తిన నేపథ్యంలో క్వాడ్​కు మద్దతిస్తూ పలు కీలక వ్యాఖ్యలు చేశారు.

బుధవారం ఫ్రెంచ్, ఆస్ట్రేలియా విదేశాంగ మంత్రులతో వర్చువల్​గా భేటీ అయ్యారు జైశంకర్. క్వాడ్​ను 'ఆసియా నాటో'గా అభివర్ణించడాన్ని తప్పు పట్టారు. రష్యా విదేశాంగ మంత్రి సెర్జే లావ్​రొవ్ గత వారం ఓ మీడియో సమావేశంలో క్వాడ్​ను ఉద్దేశిస్తూ ఆ కూటమిని 'ఆసియా నాటో' అని అన్నారు.

"భారత్​ అభివృద్ధే లక్ష్యంగా వివిధ దేశాలతో ఐక్యంగా ఉంటున్నాం. ఇదే దాని ముఖ్య ఉద్దేశం. దీని వల్ల ప్రపంచ దేశాలకూ ఉపయోగం ఉంటుంది. 'ఆసియా నాటో' అని అభివర్ణిస్తూ కొందరు మైండ్​ గేమ్​ ఆడుతున్నారు."

--జైశంకర్, భారత విదేశాంగ మంత్రి.

రష్యా రాయబారి సికోలే కుదాషేవ్.. పాశ్యాత్య దేశాల ఇండో-పసిఫిక్ కూటమి ప్రమాదకరమని అన్నారని, అది ప్రచ్ఛన్న యుద్దానికి తావిస్తుందని చెప్పినట్లు జయశంకర్​ గుర్తు చేశారు. అయితే.. భారత్​ దృష్టిలో ఇండో-పసిఫిక్​ కూటమి ఉద్దేశం వేరని ఆయన వెల్లడించారు. క్వాడ్​ దేశాలతో.. కొవిడ్ వ్యాక్సిన్లు, వాతావరణ మార్పు, సాంకేతకత, తీవ్రవాదాన్ని నిరోధించడం మొదలైన అంశాల గురించి చర్చిస్తామని పేర్కొన్నారు. దీన్ని బట్టి భారత్​ ఎలా ఆలోచిస్తుందో తెలుసుకోవాలని ఆయన అన్నారు.

ఇదీ చదవండి:టీకా రెండో డోసు తీసుకున్నా: పుతిన్