ప్రజల్లో చురుకుదనం అత్యంత తక్కువగా ఉన్న దేశాల జాబితాలో భారత్ మొదటి స్థానంలో నిలిచింది. నిద్రలేమి ఎక్కువగా ఉన్న దేశాల్లో రెండో స్థానంలో ఉంది. ప్రముఖ పిట్నెస్ సంస్థ 'ఫిట్బిట్' నివేదికలో ఈ విషయాలు వెల్లడయ్యాయి. భారత్, అమెరికా, బ్రిటన్, జపాన్, సింగపూర్ సహా 18 దేశాల ప్రజలపై సర్వే చేసి ఈ నివేదికను రూపొందించింది ఫిట్బిట్.
భారతీయులు సగటున రోజుకు 6,533 అడుగులు మాత్రమే నడుస్తున్నారు. ఇతర దేశాలతో పోల్చితే ఈ సగటు అత్యల్పం. చురుకైన దేశాల జాబితాలో హాంగ్కాంగ్ మొదటి స్థానంలో ఉంది. ఆ దేశస్థులు రోజుకు సగటున 10,133 అడుగులు నడుస్తూ ఆరోగ్యంగా ఉన్నారు.
నిద్రలేమిలో రెండో స్థానం
నిద్రలేమితో బాధపడుతున్న దేశాల్లో జపాన్ మొదటి స్థానంలో ఉండగా.. ఆ తర్వాతి స్థానంలో నిలిచింది భారత్. భారతీయులు రోజుకు సగటున 7 గంటల 1నిమిషం మాత్రమే నిద్రపోతున్నట్లు ఫిట్బిట్ నివేదిక పేర్కొంది. ఈ జాబితా ఐర్లాండ్ చివరి స్థానంలో నిలిచింది. వాళ్లు రోజుకు సగటున 7 గంటల 57 నిమిషాలు నిద్రపోతున్నారు.
75-90 ఏళ్ల మధ్య వయస్సు గల భారతీయులు రోజుకు 6 గంటల 35 నిమిషాలు మాత్రమే నిద్రిస్తున్నట్లు నివేదిక పేర్కొంది. 18-25 మధ్య వయస్సు గల యువత అర్ధరాత్రి దాటితే గానీ నిద్రలోకి జారుకోవడంలేదని ఆసక్తికర విషయాన్ని తెలిపింది. ఐనా వీరు ఏడు గంటలకు పైగా నిద్రపోవడం గమనార్హం.
ఇదీ చూడండి : అమెరికా సైన్యం చేతిలో బగ్దాదీ వారసుడు హతం
