వ్యక్తి మృతితో విమానం అత్యవసర ల్యాండింగ్​

రియాద్​ నుంచి దిల్లీకి వస్తోన్న గోఎయిర్​ విమానంలో ఓ ప్రయాణికుడికి గుండెపోటు రావటం వల్ల కరాచీ విమానాశ్రయంలో అత్యవసర ల్యాండింగ్​ చేశారు. ప్రయాణికుడిని వైద్యులు పరీక్షించి అప్పటికే ప్రాణాలు కోల్పోయినట్లు వెల్లడించారు.

ఎగురుతున్న విమానంలో ఓ ప్రయాణికుడికి గుండెపోటు రావటం వల్ల అత్యవసర ల్యాండింగ్​ చేయాల్సి వచ్చింది. అనతరం అతను అప్పటికే మృతి చెందినట్లు వైద్యులు ధ్రువీకరించారు.

దిల్లీకి చెందిన గోఎయిర్​ 'జీ8-6658ఏ' విమానం 179 మంది ప్రయాణికులతో రియాద్​ నుంచి దిల్లీకి మంగళవారం బయలుదేరింది. ఈ క్రమంలో పాకిస్థాన్​ గగనతలంలో ఉన్న సమయంలో ఓ ప్రయాణికుడు అస్వస్థతకు గురయ్యాడు. గుండెపోటు రాగా అవసరమైన వైద్య సాయం అందించారు. అతడు స్పృహ కోల్పోవడం వల్ల కరాచీ విమానాశ్రయంలో అత్యవసర ల్యాండింగ్​ చేశారు. సదరు ప్రయాణికుడిని పరీక్షించిన వైద్యులు అప్పటికే ప్రాణాలు కోల్పోయినట్లు వెల్లడించారు.

మృతుడ్ని ఉత్తర్​ప్రదేశ్​ బరేలీకి చెందిన ముహమ్మద్​ నౌషద్​గా గుర్తించారు. మృతదేహాన్ని పాకిస్థాన్​ వైద్యులు పరీక్షించినట్లు అధికారులు తెలిపారు. విమానంలో ఇంధనం నింపుకొన్న తర్వాత అక్కడి నుంచి ప్రయాణికులతో దిల్లీకి పయణమైనట్లు చెప్పారు.

ఇదీ చూడండి: లైవ్​ వీడియో: కానిస్టేబుల్ చాకచక్యంతో మహిళ ప్రాణాలు సేఫ్