'మద్దతివ్వండి'

ఉగ్రవాదంపై పోరుకు ఐరాస భద్రతా మండలిలోని 15 దేశాలను భారత్​ సంప్రదిస్తోంది. జైషే మహ్మద్​ అధినేత మసూద్​ అజార్​ను అంతర్జాతీయ ఉగ్రవాదిగా గుర్తించాలన్న ప్రతిపాదనకు మద్దతివ్వాలని భారత్​ అభ్యర్థిస్తోంది.

జైషే మహ్మద్​ అధినేత మసూద్​ అజార్​ చుట్టు ఉచ్చు బిగించే దిశగా భారత్​ అడుగులు వేస్తోంది. ఈ విషయమై తాజాగా యూఎన్​ భద్రతా మండలిలోని చైనాతో పాటు మరో 14 దేశాలను భారత్​ సంప్రదిస్తోంది. మసూద్​ను అంతర్జాతీయ ఉగ్రవాదిగా గుర్తించాలన్న ప్రతిపాదనకు మద్దతివ్వాలని అభ్యర్థిస్తోంది.​

పుల్వామా దాడికి బాధ్యత వహించిన జైషే మహ్మద్​ అధినేతను అంతర్జాతీయ ఉగ్రవాదిగా గుర్తించాలని ఇటీవలే భద్రతా మండలికి అమెరికా, బ్రిటన్​, ఫ్రాన్స్​ దేశాలు ప్రతిపాదించాయి.

ఈ నెల 14 నుంచి ఈ ప్రతిపాదనపై నిర్ణయం తీసుకునే ప్రక్రియ మొదలవుతుంది. ఈలోపు ఎవరైనా వివరణ పొందవచ్చు.

జైషే మహ్మద్​ అధినేతను అంతర్జాతీయ ఉగ్రవాదిగా గుర్తించాలని ప్రతిపాదన చేయటం గత పదేళ్లలో ఇది నాలుగోసారి. అయితే అనారోగ్యం కారణంగా ఇటీవలే మసూద్​ మృతిచెందినట్లు వార్తలు వచ్చాయి. కానీ ఈ విషయంలో స్పష్టత లేదు.