కరోనాతో ఉక్కిరిబిక్కిరి అవుతున్న ప్రపంచానికి మొట్టమొదటి టీకాను పూర్తిస్థాయిలో సిద్ధం చేసినట్లు రష్యా ఇప్పటికే ప్రకటించింది. రెండు దశల ప్రయోగాలు పూర్తి చేసుకుని.. కీలకమైన మూడో దశ ప్రయోగాల్లోకి అడుగుపెడుతోంది. ఫలితంగా ఈ వ్యాక్సిన్ ఉత్పత్తిపై అనేక దేశాలు ఆసక్తి చూపిస్తున్నాయి.
ఈ క్రమంలో భారత్‌కు చెందిన కంపెనీలు కూడా ఫేజ్-1, ఫేజ్-2 క్లినికల్ ట్రయల్స్కు సంబంధించిన సాంకేతిక సమాచారం కోరినట్లు ఆ దేశ మీడియా స్పుత్నిక్ పేర్కొంది. వ్యాక్సిన్ దేశీయ ఉత్పత్తికి, ఎగుమతికి కూడా అనుమతి కోరినట్లు తెలిపింది. ఈ మేరకు రష్యా డైరెక్ట్‌ ఇన్వెస్ట్‌మెంట్‌ ఫండ్‌ (ఆర్‌డీఐఎఫ్‌)తో చర్చించినట్లు పేర్కొంది.
"స్పుత్నిక్-వి వ్యాక్సిన్‌కు సంబంధించి ఫేజ్-1, ఫేజ్-2 సాంకేతిక వివరాల కోసం ఆర్‌డీఐఎఫ్‌ను భారత కంపెనీలు అడిగాయి. అన్ని అనుమతులూ పూర్తి చేసుకున్న అనంతరం దేశీయంగా వ్యాక్సిన్‌ను ఉత్పత్తి చేయడంతో పాటు, ఎగుమతి చేసేందుకు అనుమతి కోరినట్లు మాస్కోలోని రాయబార వర్గాలు తెలపాయి." అని స్పుత్నిక్ వెల్లడించింది.