ఇమ్రాన్​ఖాన్​ వ్యాఖ్యలను తిప్పికొట్టిన భారత్​

'భారత్​ కరోనా సమస్యను పరిష్కరించలేక ముస్లింలను లక్ష్యంగా చేసుకుందన్న' ఇమ్రాన్​ఖాన్ వ్యాఖ్యలను కేంద్రం తీవ్రంగా ఖండించింది. ఇమ్రాన్​ఖాన్​ తన దేశంలోని మైనారిటీలు ఎదుర్కొంటున్న వివక్షపై దృష్టి కేంద్రీకరించాలని సూచించింది.

'కరోనాపై పోరులో లోపాలను కప్పిపుచ్చుకునేందుకు భారత్..​​ ముస్లింలను లక్ష్యంగా చేసుకుందన్న' పాకిస్థాన్​ ప్రధాని ఇమ్రాన్​ఖాన్ వ్యాఖ్యలను కేంద్రప్రభుత్వం తిప్పికొట్టింది. కరోనా వ్యాప్తిని అడ్డుకోవడానికి బదులు.. పొరుగుదేశాలపై ఆరోపణలు చేస్తోందని దాయాదిపై మండిపడింది.

నిరాధార ఆరోపణలు చేయొద్దు..

"పాకిస్థాన్​లో కరోనా వ్యాప్తిని అడ్డుకోలేకపోయిన ఇమ్రాన్​ఖాన్​ భారత్​ను తప్పుపట్టడం సరికాదు. తమ అంతర్గత సమస్యలను సరిచేసుకోలేని వారు పొరుగు దేశంపై నిరాధార ఆరోపణలు చేయడం భావ్యం కాదు."

- అనురాగ్ శ్రీవాస్తవ, భారత విదేశాంగ శాఖ అధికార ప్రతినిధి

మైనారిటీల విషయానికొస్తే..

భారత్​లో మైనారిటీల సమస్యల గురించి ఇమ్రాన్​ఖాన్ మాట్లాడడాన్ని శ్రీవాస్తవ తప్పుపట్టారు. పాక్ ముందు​ తన దేశంలోని మైనారిటీ వర్గాలు ఎదుర్కొంటున్న వివక్షపై, సమస్యలపై దృష్టి కేంద్రీకరించాలని హితవు పలికారు.

ఇదీ చూడండి:సోమవారం నుంచి లాక్​డౌన్ సడలింపులు.. కానీ...