గగనతలంలో భారత్​, ఇజ్రాయెల్ సంయుక్త విజయం

అధునాతన ఎం​ఆర్​ఎస్​ఎమ్​ క్షిపణిని భారత్​, ఇజ్రాయెల్​ దేశాలు విజయవంతంగా పరీక్షించాయి. గతవారం జరిపిన ఈ ప్రయోగ పరీక్షలో ఇరు దేశాలకు చెందిన శాస్త్రవేత్తలు పాల్గొన్నారు.

రక్షణ రంగంలో భారత్​, ఇజ్రాయెల్​ కలిసి అరుదైన ఘనత సాధించాయి. ఉపరితలం నుంచి గగనతలంలోకి ప్రయోగించగల సామర్థ్యం ఉన్న(ఎంఆర్​ఎస్​ఎమ్)​ క్షిపణిని ఇరు దేశాలు విజయవంతంగా పరీక్షించాయి. గత వారంలో ఈ పరీక్షను నిర్వహించినట్లు ఇజ్రాయెల్​ ఏరోస్పేస్​ ఇండస్ట్రీస్(ఐఏఐ) మంగళవారం తెలిపింది. పరీక్షలో భాగంగా.. ఈ ఎం​ఆర్​ఎస్​ఎమ్​ క్షిపణిని భూమి నుంచి మొబైల్​ లాంచర్​తో ​ప్రయోగించగా.. విజయవంతంగా లక్ష్యాన్ని ఛేదించిందని వెల్లడించింది. ఇజ్రాయెల్​ రక్షణ పరిశ్రమ ఆధ్వర్యంలో జరిగిన ఈ ప్రయోగ పరీక్షలో ఇజ్రాయెల్​, భారత్​కు చెందిన శాస్త్రవేత్తలు పాల్గొన్నారు.

"ఐఏఐ, భారత్​ మధ్య బలమైన భాగస్వామ్యానికి ఈ ప్రయోగం నిదర్శనం. భారత రక్షణ పరిశోధన సంస్థ(డీఆర్​డీఓ), భారత భద్రతా దళాల సహకారంతో కలిసి నిర్వహించిన ఈ పరీక్షకు నేతృత్వం వహించినందుకు ఐఏఐ గర్వంగా భావిస్తోంది."

-- బావోజ్​ లెవీ, ఇజ్రాయెల్​ ఏరోస్పేస్​ ఇండస్ట్రీస్ అధ్యక్షుడు, సీఈఓ.

ఈ అధునాతన ఎంఆర్​ఎస్​ఎమ్​ యుద్ధ క్షిపణి గగనతలంలో శత్రువుల నుంచి రక్షణ అందించగలదు. 50-70 కి.మీ దూరం నుంచి శత్రు విమానాలపై దాడి చేయగలదు.

ఐఏఐ, భారత రక్షణ పరిశోధన సంస్థ(డీఆర్​డీఓ) సంయుక్తంగా ఈ క్షిపణిని అభివృద్ధి చేశాయి. భారత్​లోని త్రివిధ దళాలతో పాటు, ఇజ్రాయెల్​ భద్రతా బలగాలు దీనిని వినియోగించనున్నాయి.

ఇదీ చూడండి:పొరపాటున దేశం దాటి.. 11 ఏళ్లకు ఇల్లు చేరి...