భారత్-బంగ్లాదేశ్ మధ్య రైలు ప్రయాణాన్ని సాధ్యమైనంత తొందరగా ప్రారంభించేందుకు కేంద్రం వడివడిగా అడుగులేస్తోంది. ఇరుదేశాల మధ్య రైలు మార్గాన్ని వచ్చే ఏడాది చివరికల్లా పూర్తి చేయనున్నట్లు కేంద్రమంత్రి జితేంద్రసింగ్ ప్రకటించారు. భారత 75వ స్వాతంత్ర్య దినోత్సవాన్ని పురస్కరించుకొని 2022 ఆగస్టు 15న తొలి రైలు పట్టాలెక్కనుందని స్పష్టం చేశారు. ఈశాన్య రాష్ట్రాలను బంగ్లాదేశ్తో కలుపుతూ.. త్రిపురలోని అగర్తలా నుంచి బంగ్లాదేశ్లోని అఖౌరా మధ్య ఈ రైలు కూతపెట్టనున్నట్లు తెలిపారు.
రైలు మార్గానికి కావలసిన భూసేకరణ పూర్తయిందని తెలిపిన జితేంద్ర సింగ్.. ఈ నిర్మాణానికి కేంద్ర ప్రభుత్వం 580 కోట్లు మంజూరు చేసినట్లు స్పష్టం చేశారు. ఈ ప్రాజెక్టు కోసం 600 మంది ప్రావీణ్యం కలిగిన వ్యక్తులు 24 గంటలపాటు పని చేస్తున్నట్లు వివరించారు.