చైనాకు మరో గట్టి ఎదురుదెబ్బ తగిలింది. మిత్రదేశం రష్యా... చైనాకు ఎస్-400 క్షిపణుల పంపిణీని నిలిపివేస్తున్నట్లు ప్రకటించింది. తదుపరి డెలివరీని ఎప్పుడు పునరుద్ధరిస్తుందో కూడా స్పష్టం చేయలేదు.
చైనా వార్తాపత్రిక సోహు రాసిన వార్తా కథనాన్ని ప్రస్తావిస్తూ... యూఏవైర్ పత్రిక కీలక వ్యాఖ్యలు చేసింది.
"చైనాకు అందించాల్సిన 'ఎస్-400 క్షిపణుల పంపిణీని వాయిదా వేస్తున్నట్లు రష్యా ప్రకటించింది. ఇది ఒకందుకు చైనాకు మంచే చేస్తుందని భావించవచ్చు. ఆయుధాన్ని పొందడం... దస్త్రాలపై సంతకం చేయడమంత సులువు కాదు కదా!"
- యూఏవైర్
ఇటీవలి కాలంలో డ్రాగన్ గూఢచర్యానికి పాల్పడుతోందని తీవ్ర ఆరోపణలు చేసిన రష్యా... తాజాగా ఈ కీలక నిర్ణయం తీసుకుంది.
కరోనా కారణంగానే..
రష్యా ప్రకటనపై చైనా భిన్నంగా స్పందించింది. కరోనా విజృంభిస్తున్న వేళ ఎస్-400 క్షిపణులను చైనాకు సరఫరా చేయడం మంచిది కాదని... అందుకే రష్యా ఇలాంటి నిర్ణయం తీసుకుందని పేర్కొంది.
క్లిష్టమైన ప్రక్రియ
"ఈ ఎస్-400 క్షిపణుల పంపిణీ చాలా క్లిష్టమైన ప్రక్రియ. ఈ ఆయుధ ప్రయోగంలో శిక్షణ కోసం చైనా తన సిబ్బందిని పంపాల్సి ఉంది. అలాగే రష్యా కూడా.. ఆ ఆయుధ ప్రయోగం తెలిపే చాలా మంది సాంకేతిక నిపుణులను పంపాల్సిన అవసరం ఉంది."
- సోహు, చైనా వార్తాపత్రిక
భీకర ఆయుధం
రష్యాకు చెందిన టాస్ వార్తా సంస్థ ప్రకారం, 2018లో రష్యా నుంచి మొదటి బ్యాచ్ ఎస్-400 క్షిపణులను చైనా అందుకుంది. అత్యాధునికమైన ఈ క్షిపణితో 30 కి.మీ ఎత్తులోని, 400 కి.మీ దూరంలోని శత్రు లక్ష్యాలను ధ్వంసం చేయవచ్చు.
గట్టి దెబ్బే
సెయింట్ పీటర్స్బర్గ్ ఆర్కిటిక్ సోషల్ సైన్సెన్స్ అకాడమీ అధ్యక్షుడిగా పనిచేసిన వాలెరి మిట్కో... రహస్య సమాచారాన్ని చైనా నిఘా వర్గాలకు అందించినట్లు రష్యా గుర్తించింది. అలా తమపై చైనా గూఢచర్యానికి పాల్పడినందుకు తీవ్ర ఆగ్రహం వ్యక్తం చేసింది. తాజాగా ఎస్-400 క్షిపణుల పంపిణీని నిలిపివేసింది.
ఇదీ చూడండి:కరోనా ఎఫెక్ట్: పర్యటకం బంద్.. సమావేశాలు వాయిదా
