కరోనా వైరస్ మహమ్మారిని ఎదుర్కొనేందుకు అగ్రరాజ్యం అమెరికాతో పాటు అభివృద్ధి చెందిన దేశాలు కూడా తీవ్రంగా శ్రమిస్తున్నాయి. లాక్డౌన్ విధించడమే కాకుండా వైరస్ సోకిన వ్యక్తుల్ని గుర్తించేందుకు లక్షల సంఖ్యలో కొవిడ్‌ నిర్ధరణ పరీక్షలు చేపడుతున్నాయి. ఈ సమయంలో ప్రపంచంలో అధిక వృద్ధ జనాభా కలిగిన జపాన్లో.. వైరస్ తీవ్రత స్వల్ప కాలంలోనే అదుపులోకి రావడం ప్రపంచదేశాలను ఆశ్చర్యానికి గురిచేస్తోంది. తాజాగా దేశంలో విధించిన అత్యయికస్థితిని కూడా ఎత్తివేస్తున్నట్లు ప్రభుత్వం ప్రకటించగా.. జపాన్ ఏవిధంగా వైరస్ను అరికట్టిందనే అంశం అందరిలో ఆసక్తి కలిగిస్తోంది.
దాదాపు 13 కోట్ల జనాభా కలిగిన జపాన్లో ఇప్పటిదాకా దాదాపు 17,000 పాజిటివ్‌ కేసులు నమోదుకాగా.. 825 మంది మృత్యువాతపడ్డారు. ఇక అత్యధిక జనసాంద్రత కలిగిన టోక్యో మహానగరంలో కొత్తగా నమోదవుతున్న కేసుల సంఖ్య పదుల సంఖ్యకు పడిపోయింది. అయితే గత నెలలో కాస్త తీవ్రత ఎక్కువగా ఉన్న సమయంలో.. అత్యయికస్థితి ప్రకటించినప్పటికీ పూర్తి లాక్డౌన్ విధించలేదు. దీంతో క్షౌరశాలలు, రెస్టారెంట్లు కూడా తెరిచే ఉంచారు. కొన్ని జాగ్రత్తలు తీసుకుంటూ ప్రజలను బయట తిరిగేందుకు కూడా అనుమతించారు.
పరీక్షలూ తక్కువే
కొవిడ్‌-19 నిర్ధరణ పరీక్షలు కూడా ఆశించినంతగా చేయలేదు. కేవలం దేశజనాభాలో 0.2శాతం ప్రజలకు మాత్రమే కరోనా పరీక్షలు నిర్వహించారు. అంతేకాకుండా భౌతిక దూరంపై ఉన్న ఆంక్షలను స్వల్పకాలంలోనే సడలించినప్పటికీ వైరస్ వ్యాప్తి మిగతా అభివృద్ధి చెందిన దేశాలతో పోలిస్తే చాలా తక్కువగానే ఉంది.
కొవిడ్‌ మరణాల రేటు కూడా స్వల్పంగానే ఉంది. అయితే, అత్యంత సాంకేతికత, మెరుగైన వైద్య సదుపాయాలున్న దేశాల్లోనూ వైరస్ నియంత్రణలోకి రాకుండా రోజురోజుకు విజృంభిస్తోంది. ఈ సమయంలో జపాన్లో తాజా పరిస్థితులు సామాన్యులతో పాటు నిపుణులను కూడా ఆశ్చర్యానికి గురిచేస్తున్నాయి. వైరస్ తీవ్రత తగ్గడానికి కచ్చితమైన కారణాన్ని గుర్తించనప్పటకీ.. జపాన్ ప్రజల జీవన విధానంతో పాటు ఎన్నో కారకాలు వారికి తోడ్పడినట్లు నిపుణులు విశ్లేషిస్తున్నారు.
సాధారణ సమయాల్లోనూ జపాన్ ప్రజలు ధరించే మాస్క్‌లు(మాస్క్‌ కల్చర్‌), తక్కువ ఊబకాయం కలిగిన ప్రజలు, వైరస్ బయటపడ్డ తొలినాళ్లలోనే పాఠశాలల మూత వంటి చర్యలు వైరస్ వ్యాప్తిని నిరోధించడంలో దోహదపడ్డట్లు నిపుణులు అంచనా వేస్తున్నారు. వీటితోపాటు మిగతా భాషలతో పోలిస్తే జపనీయులు మాట్లాడేటప్పుడు తక్కువ నోటి తుంపరులు బయటకు వస్తాయని.. ఇది కూడా వైరస్ వ్యాప్తి నిరోధకంగా పనిచేసి ఉండవచ్చని అక్కడి నిపుణులు విశ్లేషిస్తున్నారు.