యుద్ధం వస్తే ఇజ్రాయెల్​పై ఇరాన్ బాంబుల వర్షం!

పశ్చిమాసియాలో యుద్ధం వస్తే అమెరికా మిత్రదేశం ఇజ్రాయెల్​పై ఇరాన్​ బాంబుల వర్షం కురిపిస్తుందని హిజ్బుల్లా అధినేత హసన్​ నస్రాల్లా హెచ్చరించారు. యుద్ధం జరగకుండా ఉండడానికి కృషి చేయాలని ఇస్లామిక్​, ఈయూ దేశాలను కోరారు.

అమెరికా, ఇరాన్ మధ్య యుద్ధం జరిగితే... యూఎస్​ మిత్రదేశమైన ఇజ్రాయెల్​ తటస్థంగా ఉండదని హిజ్బుల్లా నేత హసన్​​ నస్రాల్లా అభిప్రాయపడ్డారు. అదే జరిగితే ఇజ్రాయెల్​పై ఇరాన్​ తీవ్రంగా బాంబుల దాడి చేస్తుందని హెచ్చరించారు.

ఇరాన్​కు మిత్ర దేశం లెబనాన్​. ప్రస్తుతం లెబనాన్​ ప్రభుత్వంలో హిజ్బుల్లా ప్రధాన భాగస్వామిగా ఉంది. ఆ పార్టీ అధినేత హసన్​ నస్రాల్లా. ఆయన హిజ్బుల్లాకు చెందిన అల్​-మనార్​ టెలివిజన్​లో ప్రసారం చేసిన ఇంటర్వ్యూలో తాజా వ్యాఖ్యలు చేశారు. అయితే హిజ్బుల్లాను అమెరికా ఒక ఉగ్రవాద సంస్థగా పరిగణిస్తుండడం గమనార్హం.

యుద్ధ నివారణే శరణ్యం

అమెరికా, ఇరాన్​ మధ్య కొన్ని వారాలుగా ఉద్రిక్త వాతావరణం కొనసాగుతోంది. అగ్రరాజ్య అధ్యక్షుడు డొనాల్డ్​ ట్రంప్... ఇరాన్​పై మాటల యుద్ధాన్ని తీవ్రం చేశారు. ఈ నేపథ్యంలో హిజ్బుల్​ నేత హసన్​ నస్రాల్లా తీవ్రంగా స్పందించారు. 'పశ్చిమాసియాలో మన సామూహిక బాధ్యత ఇరాన్​పై అమెరికా యుద్ధాన్ని నివారించడానికి కృషి చేయడమే' అని ఆయన అన్నారు.

"యుద్ధం ఇజ్రాయెల్​ను తుడిచిపెట్టగలదని అమెరికన్లు అర్థం చేసుకున్నప్పుడు, వారు ఆ విషయాన్ని పునఃపరిశీలిస్తారు."
- హసన్​ నస్రాల్లా, హిజ్బుల్​ పార్టీ అధినేత

"ట్రంప్ యుద్ధోన్మాదానికి అడ్డుకట్ట"

ఇరాన్​పై దాడి చేసే విషయంలో ట్రంప్​కు ఉన్న అధికారాన్ని పరిమితం చేస్తూ శుక్రవారం అమెరికా ప్రతినిధుల సభ ఓటు వేసింది. ఇరాన్​ విషయంలో ట్రంప్ అనుసరిస్తున్న విధానం అనవసర యుద్ధానికి దారితీస్తుందనే భయంతోనే వారు ఈ నిర్ణయం తీసుకున్నారు.

ఇదీ చూడండి: భారత్- అమెరికా వాణిజ్య బంధం బలోపేతం